નવી દિલ્હી ખાતે યોજાયેલી ચોથી 'ફેસ્ટિવલ ઓફ આઈડિયાઝ' પરિષદમાં કેન્દ્રીય વાણિજ્ય અને ઉદ્યોગ મંત્રી પિયુષ ગોયલે ભારતીય ઉદ્યોગ જગતને સ્પષ્ટ સંદેશ આપ્યો છે કે ભારતીય ઉત્પાદકોએ માત્ર વિશાળ ઘરેલું બજારના આરામદાયક વાતાવરણમાંથી બહાર આવીને વિશ્વસ્તરીય બ્રાન્ડ્સનું નિર્માણ કરવું પડશે. તેમણે જણાવ્યું હતું કે માત્ર દેશમાં જ વેચાણ કરતા રહેવાથી ઉત્પાદકો ગુણવત્તા પ્રત્યે ઉદાસીન બની જાય છે, પરંતુ હવે સમય બદલાઈ રહ્યો છે અને વૈશ્વિક બજારમાં ટકવા માટે અત્યંત સ્પર્ધાત્મક બનવું અનિવાર્ય છે. મંત્રીએ તાતા, મહિન્દ્રા અને ઓયો (OYO) ઉપરાંત ભારતની યુવા પ્રતિભાને પણ એક મજબૂત વૈશ્વિક બ્રાન્ડ તરીકે ઓળખાવતા બોલિવૂડ અને દેશની કાર્યક્ષમતાનું ઉદાહરણ આપ્યું હતું. તેમણે ઉલ્લેખ કર્યો હતો કે આજે વૈશ્વિક જીડીપીના ૭૫ ટકા હિસ્સો ધરાવતા દેશો ભારત સાથે વેપાર કરારો દ્વારા વિશેષ સુવિધાઓ પૂરી પાડી રહ્યા છે, ત્યારે પશ્મિના શાલ અને કોલ્હાપુરી ચપ્પલ જેવા પારંપરિક ઉત્પાદનોને વૈશ્વિક સ્તરે પહોંચાડવાની જરૂર છે.
વૈશ્વિક સ્પર્ધા અને આંતરરાષ્ટ્રીય બજારની વાત કરતા મંત્રીએ વિયેતનામ, મલેશિયા અને ઇન્ડોનેશિયા જેવા દેશો તરફથી મળી રહેલા પડકારોનો ઉલ્લેખ કર્યો હતો અને જણાવ્યું હતું કે ભારતે મુક્ત વેપાર કરારોમાં આ દેશો સામે અગ્રીમતા મેળવવી પડશે. તેમણે સ્વિસ ફૂટવેર બ્રાન્ડ 'ઓન' (On) નું ઉદાહરણ આપીને સમજાવ્યું કે નાની કંપનીઓ પણ કેવી રીતે નવીન રણનીતિ અપનાવીને નાઇકી જેટી મસમોટી વૈશ્વિક બ્રાન્ડ્સને ટક્કર આપી રહી છે. આ ઉપરાંત, આર્ટિફિશિયલ ઇન્ટેલિજન્સ માટે ઉપયોગમાં લેવાતા ગ્રાફિક્સ પ્રોસેસિંગ યુનિટ્સ (GPUs) જેવા મહત્ત્વના ક્ષેત્રોમાં આયાત પર નિર્ભરતા અને ડબલ્યુટીઓ (WTO) ના નિયમોનું પાલન ન કરતા દેશો દ્વારા પ્રિડેટરી પ્રાઇસિંગ તથા સપ્લાય ચેઈનની અસ્થિરતા સામે પણ તેમણે સાવચેત રહેવા જણાવ્યું હતું. ચાઇનીઝ ફટાકડા અને આયાતી ચીજવસ્તુઓ વિશે વાત કરતા તેમણે સ્પષ્ટ કર્યું કે સ્વદેશી ઉત્પાદનોને પ્રાથમિકતા આપવી જોઈએ, પરંતુ ગ્રાહકની સ્વતંત્રતા છીનવીને કાયદાકીય કે બળજબરીપૂર્વક પ્રતિબંધો ન લાદી શકાય, આ નિર્ણય દરેક નાગરિકના હૃદયમાંથી આવવો જોઈએ.
કાર્યસંસ્કૃતિ અંગે પોતાના વિચારો રજૂ કરતા પિયુષ ગોયલે વિદેશી વર્ક-લાઈફ બેલેન્સના ખ્યાલને ફગાવી દીધો હતો અને ભારતીય ડીએનએમાં રહેલી સખત મહેનતની પ્રશંસા કરી હતી. તેમણે કહ્યું કે ઘડિયાળના કાંટા સામે જોઈને કામ કરનારા ક્યારેય સફળતાના શિખરો સર કરી શકતા નથી અને જે દેશો સામાજિક કલ્યાણ અને આરામ પર વધુ નિર્ભર છે તેમને આજે શ્રમિકોની તંગીનો સામનો કરવો પડી રહ્યો છે. મંત્રીએ ભારપૂર્વક જણાવ્યું કે ભારતીય અર્થવ્યવસ્થાની સફળતા પાછળ અહીંના યુવાનોની અથાક મહેનત અને મજબૂત વર્ક એથિકનો મોટો ફાળો છે. અંતમાં તેમણે ઉદ્યોગોને આહ્વાન કર્યું કે ભારતીય પ્રતિભા અને ઉત્પાદનોની ગુણવત્તાના જોરે દેશે વૈશ્વિક અર્થતંત્રમાં પોતાની આગવી અને પ્રભુત્વવાળી ઓળખ ઊભી કરવી જોઈએ.
