આગામી દિવાળીના તહેવારોને ધ્યાનમાં રાખીને જામનગર શહેર અને ગ્રામ્ય વિસ્તારમાં કાયદો અને વ્યવસ્થા તેમજ ટ્રાફિક નિયમનની સ્થિતિ ચુસ્ત રાખવા માટે પોલીસ તંત્ર સક્રિય બન્યું છે. ગતરાત્રિના સમયે જામનગરના વ્યસ્ત માર્ગો જેવા કે દરબારગઢ, સુભાષબ્રિજ અને ત્રણબત્તી વિસ્તારમાં પોલીસે વિશેષ વાહન ચેકિંગ અભિયાન હાથ ધર્યું હતું. લાલપુર વિભાગના એએસપી પ્રતિભા તેમજ જામનગર શહેર અને ગ્રામ્ય વિભાગના ડીવાયએસપી જે.એન. ઝાલા અને પિયુષ વાંદાના કુશળ માર્ગદર્શન હેઠળ સિટી એ ડિવિઝન પોલીસ અને એલસીબી (LCB) સ્ટાફના જવાનો આ સંયુક્ત ઓપરેશનમાં જોડાયા હતા, જેના કારણે વાહનચાલકોમાં ભારે ફફડાટ ફેલાયો હતો.
આ સઘન ચેકિંગ દરમિયાન પોલીસની ટીમોએ નિયમોનું ઉલ્લંઘન કરતા અનેક વાહનચાલકોને ઝડપી પાડ્યા હતા. જેમાં પોલીસ દ્વારા હથિયારધારાનો ભંગ કરનાર ૮ શખ્સો સામે કાયદેસરની કાર્યવાહી કરવામાં આવી હતી. આ ઉપરાંત, તહેવારોના માહોલમાં કોઈ અનિચ્છનીય બનાવ ન બને અને માર્ગો પર સલામતી જળવાઈ રહે તે હેતુથી નશાની હાલતમાં વાહન ચલાવતા ૧૨ ચાલકો સામે પણ સપાટો બોલાવવામાં આવ્યો હતો. ટ્રાફિક નિયમોના પાલનને સખત બનાવવા માટે મોટર વ્હીકલ એક્ટ (MV Act) ની કલમ ૨૦૭ હેઠળ પોલીસે કુલ ૨૭ જેટલા વાહનોને ડીટેઈન કરીને કબજે લીધા હતા.
કાર્યવાહી દરમિયાન ખાસ કરીને વાહનોની નંબર પ્લેટ અને ગ્લાસ પરની કાળી ફિલ્મને લઈને પણ કડક તપાસ કરવામાં આવી હતી. ફેન્સી કે નંબર પ્લેટ વગર વાહન હંકારતા ૬૧ ચાલકો સામે દંડકીય કાર્યવાહી કરાઈ હતી, જ્યારે ૪૪ વાહનોમાંથી નિયમ વિરુદ્ધ લગાવવામાં આવેલી કાળી ફિલ્મ (ટિન્ટ) દૂર કરવામાં આવી હતી. આ ઉપરાંત બેફિકરાઈથી વાહન ચલાવતા ૧૧ ચાલકો અને મોડીફાઈડ સાયલેન્સર લગાવીને અવાજનું પ્રદૂષણ ફેલાવતા ૪ વાહનો મળી કુલ અનેક કેસોમાં પોલીસે સ્થળ પર જ રૂ. ૬૧,૧૦૦ નો રોકડ દંડ વસૂલ્યો હતો. પોલીસની આ આક્રમક ડ્રાઇવથી ટ્રાફિક નિયમોનું ઉલ્લંઘન કરતા તત્વોમાં ભારે ખળભળાટ મચી ગયો છે.
