આસામના ધુબરી જિલ્લામાં પોલીસે શંકાસ્પદ બાંગ્લાદેશી નાગરિકો વિરુદ્ધ એક મોટું અભિયાન હાથ ધરીને જોગોમાયા ઘાટ પરથી ૨૫ કરતા વધુ શંકાસ્પદ વ્યક્તિઓની અટકાયત કરી છે. ઉલ્લેખનીય છે કે ધુબરી જિલ્લો બાંગ્લાદેશ સાથે નદી સહિતની આંતરરાષ્ટ્રીય સરહદ ધરાવતો સંવેદનશીલ વિસ્તાર છે. પોલીસ સૂત્રોના જણાવ્યા અનુસાર, આ તમામ શંકાસ્પદ લોકો મોટર બોટ દ્વારા હાથસિંગીમારીથી ધુબરી પહોંચ્યા હતા. પોલીસને આ અંગે ચોક્કસ બાતમી મળી હતી, જેના આધારે તાત્કાલિક કાર્યવાહી કરીને વ્યસ્ત ગણાતા ધુબરી ઘાટ પર જ તેમને ઘેરી લઈને ઝડપી લેવામાં આવ્યા હતા.
અટકાયત કરવામાં આવેલા તમામ ઇસમોની હાલ ધુબરી પોલીસ રિઝર્વ ખાતે સઘન પૂછપરછ ચાલી રહી છે. સુરક્ષા એજન્સીઓ દ્વારા તેમની સાચી ઓળખ, ભારતમાં પ્રવેશવાનો હેતુ અને તેમની અન્ય ગતિવિધિઓ વિશે ઊંડાણપૂર્વક તપાસ કરવામાં આવી રહી છે. સરહદી વિસ્તારોમાં ગેરકાયદે પ્રવેશ અટકાવવા માટે પોલીસ સતત એલર્ટ મોડ પર છે અને આ પૂછપરછના આધારે આ નેટવર્ક સાથે જોડાયેલા અન્ય લોકોના નામ પણ બહાર આવે તેવી પૂરી શક્યતા છે.
આ સમગ્ર પ્રકરણની તપાસ દરમિયાન સુરક્ષા એજન્સીઓ દ્વારા વધુ એક મહત્ત્વનો ખુલાસો કરવામાં આવ્યો છે. દક્ષિણ સાલમારા-માનકાચાર જિલ્લાના ખરુઆબંધા પોલીસ સ્ટેશન વિસ્તારમાં પોલીસે ચાર શખ્સોની ધરપકડ કરી છે, જેઓ નાણાકીય લાભ લઈને બાંગ્લાદેશી નાગરિકોને ભારતમાં ગેરકાયદે પ્રવેશ કરાવવામાં અને તેમની અવરજવરમાં મદદ કરતા હતા. હાલ ખરુઆબંધા પોલીસ આ એજન્ટોની સઘન પૂછપરછ કરી રહી છે જેથી આ માનવ તસ્કરી અને ઘૂસણખોરીના મોટા રેકેટનો પર્દાફાશ કરી શકાય.
