ટેક્નોલોજી ક્ષેત્રની જાણીતી કંપની ઇન્ટેલેક્ટ ડિઝાઇન એરેનાએ નાણાકીય વર્ષ ૨૦૨૭ના બીજા ત્રિમાસિક ગાળાના નાણાકીય પરિણામો જાહેર કર્યા છે, જેમાં કંપનીએ ઉત્સાહજનક પ્રદર્શન કર્યું છે. સમીક્ષા હેઠળના સમયગાળામાં કંપનીનું ઓપરેશનલ રેવન્યુ વધીને ૮૫૫.૪૦ કરોડ રૂપિયા થયું છે, જે ગત નાણાકીય વર્ષના સમાનગાળામાં ૭૫૭ કરોડ રૂપિયા હતું. આ સાથે જ કંપનીની કુલ આવક ૮૭૮ કરોડ રૂપિયા રહી છે જ્યારે ટેક્સ બાદનો ચોખ્ખો નફો (PAT) વધીને ૧૦૪ કરોડ રૂપિયા પર પહોંચ્યો છે, જે ગત વર્ષે ૧૦૨ કરોડ રૂપિયા હતો. કંપનીની આ મજબૂત નાણાકીય સ્થિતિ વૈશ્વિક સ્તરે તેની પ્રોડક્ટ્સ અને સર્વિસની વધતી માંગ દર્શાવે છે.
નાણાકીય વિશ્લેષણ કરીએ તો, આ ત્રિમાસિક ગાળામાં કંપનીનું પ્લેટફોર્મ રેવન્યુ ૧૩૩ કરોડ રૂપિયા, લાયસન્સ રેવન્યુ ૧૬૪ કરોડ રૂપિયા અને એએમસી (AMC) રેવન્યુ ૧૬૦ કરોડ રૂપિયા નોંધાયું છે. લાયસન્સ, પ્લેટફોર્મ અને એએમસીનો સમાવેશ કરતા લાયસન્સ-લિંક્ડ રેવન્યુમાં પણ સારો ઉછાળો જોવા મળ્યો છે, જે ગત વર્ષના ૪૨૩ કરોડ રૂપિયાની સામે વધીને ૪૫૭ કરોડ રૂપિયા થયો છે. વધુમાં, કંપનીનું આ ત્રિમાસિક ગાળાનું કુલ કલેક્શન ૮૧૫ કરોડ રૂપિયા રહ્યું છે, જે બિઝનેસમાં મજબૂત કેશ ફ્લો અને ગ્રાહકો તરફથી સમયસરના પેમેન્ટનું સૂચન કરે છે.
કંપનીના આ શાનદાર પ્રદર્શન અંગે વાત કરતા ઇન્ટેલેક્ટ ડિઝાઇન એરેનાના ચેરમેન અને મેનેજિંગ ડિરેક્ટર અરુણ જૈને જણાવ્યું હતું કે, આ ત્રિમાસિક ગાળામાં 'એમસોક' (MSOCK) નું લોન્ચિંગ એ અમારી એઆઈ-નેટિવ એન્ટરપ્રાઇઝ ટ્રાન્સફોર્મેશનની સફરમાં એક સીમાચિહ્ન સમાન છે. તેમણે ઉમેર્યું હતું કે 'eMACH.ai' અને 'Purple Fabric' સાથે મળીને આ વાસ્તવિક નવીનતા અમારી સ્પર્ધાત્મક ક્ષમતાને વધુ મજબૂત બનાવે છે અને એન્ટરપ્રાઇઝ મોર્ડનાઇઝેશનમાં નવી તકોના દ્વાર ખોલે છે. કંપનીના મજબૂત ગ્લોબલ કસ્ટમર રિલેશન્સ અને ભવિષ્યની મજબૂત ડીલ પાઇપલાઇનને કારણે શેરધારકો માટે દીર્ઘકાલીન મૂલ્યનું સર્જન થશે અને કંપની ટકાઉ તથા નફાકારક વિકાસના પંથે આગળ વધશે.
