સ્કોટલેન્ડના રમણીય દરિયાકાંઠે આવેલી અને એરશિપ એટલે કે વિમાન જેવા આકાર ધરાવતી પ્રખ્યાત 'એરશિપ 002' કેબિન આજે વિશ્વભરના પ્રવાસીઓ માટે આકર્ષક કેન્દ્ર બની ગઈ છે. જાણીતા આર્કિટેક્ટ રોડરિક જેમ્સ અને ડિઝાઇનર અમાનડા મરખમ દ્વારા નિર્મિત આ પ્રોપર્ટી તેની અનોખી એલ્યુમિનિયમ ક્લેડેડ ડિઝાઇન, કર્વ્ડ સિલુએટ અને ડ્રેગનફ્લાય જેવી બારીઓને કારણે ભવિષ્યવાદી નૌકા જેવી દેખાય છે. સાઉન્ડ ઓફ મલ અને આર્જનામરચન પેનિન્સુલાના મનોહર દરિયાઈ દૃશ્યો સાથે ચાર એકરના વિશાળ વિસ્તારમાં ફેલાયેલી આ જગ્યા પ્રવાસીઓને શાંતિ અને કુદરતી સૌંદર્યનો અદ્ભુત અનુભવ કરાવે છે. આ અનોખા આર્કિટેક્ચરને કારણે જ યુકેમાં એરબીએન્ડબી પર આ પ્રોપર્ટી સૌથી વધુ વિશ લિસ્ટ કરાયેલી જગ્યાઓમાં સ્થાન ધરાવે છે.
આ વેચાણમાં માત્ર 'એરશિપ 002' જ નહીં પરંતુ તેની સાથે અન્ય બે અતિ આકર્ષક રિસોર્ટ 'પાયલટહાઉસ' અને 'કેપ્ટન કેબિન' પણ સામેલ છે. આ ઉપરાંત પ્રોપર્ટી મેનેજમેન્ટ માટે 'ધ ઓલ્ડ ચેપલ' નામનું રહેઠાણ પણ ઉપલબ્ધ કરાવવામાં આવ્યું છે. આ સમગ્ર પોર્ટફોલિયો છેલ્લા ચાર વર્ષથી સતત વાર્ષિક અંદાજે 100,000 પાઉન્ડની મજબૂત આવક રળી રહ્યો છે, જે તેને એક ઉત્તમ અને સ્થાપિત હોસ્પિટાલિટી બિઝનેસ બનાવે છે. સ્વિલિમ્સ (Savills) દ્વારા લિસ્ટ કરાયેલી આ પ્રોપર્ટી માત્ર ઉનાળા પૂરતી સીમિત નથી, પરંતુ ઉત્તમ ઇન્સ્યુલેશન, અંડરફ્લોર હીટિંગ અને વુડ-બર્નિંગ સ્ટોવ જેવી આધુનિક સુવિધાઓને કારણે તે આખા વર્ષ દરમિયાન પ્રવાસીઓ માટે ખુલ્લી રહે છે.
ટેલિવિઝન શોઝમાં પ્રખ્યાત થયેલી આ પ્રોપર્ટીના વેચાણ પાછળ એક સામાજિક ઉદ્દેશ્ય પણ જોડાયેલો છે. આ પ્રોપર્ટીમાંથી થતી આવકનો ઉપયોગ રોડરિક જેમ્સ દ્વારા સામાજિક કાર્યો, સ્થાનિક સ્તરે મકાનોના નિર્માણ તેમજ વંચિત યુવાનો અને ભૂતપૂર્વ ગુનેગારોને વ્યવસાયિક તાલીમ આપવા માટે કરવામાં આવે છે. હવે આ સફરને આગળ વધારવા માટે નવા ખરીદનાર સમક્ષ એક અનન્ય તક ઊભી થઈ છે. 750,000 પાઉન્ડથી વધુની પ્રાઇસ રેન્જમાં ઉપલબ્ધ આ પ્રોપર્ટી રોકાણકારો માટે કલાત્મક જીવનશૈલી અને સ્થિર વ્યવસાયિક આવકનું એક બેજોડ મિશ્રણ સાબિત થશે.
