ઇલેક્ટ્રોનિક્સ મેન્યુફેક્ચરિંગ સેક્ટરમાં અગ્રેસર એવી સિર્મા એસજીએસ ટેક્નોલોજીએ ચાલુ નાણાકીય વર્ષના બીજા ત્રિમાસિક ગાળામાં શાનદાર નાણાકીય દેખાવ કરતા રૂ. ૧,૯૯૯.૫ કરોડની ઐતિહાસિક આવક સાથે ૭૩.૨ ટકાની મજબૂત વૃદ્ધિ હાંસલ કરી છે. કંપનીનો કરવેરા પછીનો નફો (PAT) ગત વર્ષના સમાનગાળાના રૂ. ૬૬ કરોડથી ૮૭.૨ ટકા ઉછળીને સીધો રૂ. ૧૨૪ કરોડ પર પહોંચી ગયો છે. આ ઉપરાંત, નાણાકીય વર્ષ ૨૦૨૭ના પ્રથમાર્ધમાં કંપનીએ કુલ રૂ. ૩,૬૦૩ કરોડની આવક અને રૂ. ૨૩૦ કરોડનો નફો રળીને પાછલા નાણાકીય વર્ષના સમગ્ર આંકડાઓને અત્યારથી જ વટાવી દીધા છે, જે કંપનીની મજબૂત બજાર પકડ દર્શાવે છે.
કંપનીના મેનેજિંગ ડિરેક્ટર જસબીર સિંહ ગુજરાલે આ ઉત્કૃષ્ટ પ્રદર્શન પાછળના મુખ્ય કારણો જણાવતા કહ્યું કે વિવિધ બિઝનેસ સેગમેન્ટ્સમાં વ્યાપક વૃદ્ધિ અને ઓપરેશનલ કાર્યક્ષમતાએ આ સફળતા અપાવી છે. આવકમાં વધારો થવાની સાથે ત્રિમાસિક ગાળામાં ઓવરહેડ ખર્ચ ઘટીને ૧૧ ટકા થઈ ગયો છે, જ્યારે કંપનીએ મજબૂત કોસ્ટ ટ્રેકિંગ અને ગ્રાહકો પાસેથી ફુગાવા સંબંધિત પડકારોને સફળતાપૂર્વક ઝીલીને પોતાના માર્જિનને સુરક્ષિત રાખ્યું છે. ખાસ કરીને ઓટોમોટિવ સેગમેન્ટમાં ૯૧ ટકા, ઇન્ડસ્ટ્રિયલ સેગમેન્ટમાં ૮૬ ટકા અને કન્ઝ્યુમર સેગમેન્ટમાં ૫૭ ટકાનો જબરદસ્ત ઉછાળો જોવા મળ્યો છે, જ્યારે નિકાસ અને ODM સેગમેન્ટ પણ કંપનીની મુખ્ય તાકાત સાબિત થયા છે.
આગામી ભવિષ્યની રણનીતિ વિશે વાત કરતા એમડી જસબીર સિંહ ગુજરાલે જણાવ્યું હતું કે કંપની નાણાકીય વર્ષ ૨૦૨૮ સુધીમાં ૧ બિલિયન ડૉલર (અબજ ડૉલર)ની આવકનો આંકડો વટાવવા માટે સંપૂર્ણપણે તૈયાર છે. માર્ચ ૨૦૨૭ની આસપાસ પ્રિન્ટેડ સર્કિટ બોર્ડ (PCB) વ્યવસાયમાં થનારી આગામી વિસ્તરણ યોજના અને નવા પ્રોજેક્ટ્સ આ લક્ષ્યને પ્રાપ્ત કરવામાં મહત્વપૂર્ણ ભૂમિકા ભજવશે. આ મજબૂત આત્મવિશ્વાસ સાથે કંપનીએ વાર્ષિક વૃદ્ધિ દરનો અંદાજ ૩૦-૩૫ ટકાથી વધારીને ૩૫ ટકાથી વધુ કર્યો છે, જેમાં રૂ. ૭,૦૦૦ કરોડની વાર્ષિક આવક અને રૂ. ૧,૬૦૦ કરોડથી વધુની નિકાસનો મહત્વાકાંક્ષી લક્ષ્યાંક સામેલ છે.
