ગુજરાતની અત્યંત સુરક્ષિત સાબરમતી જેલમાં ચોવીસ કલાકની કડક નજર હેઠળ બંધ કુખ્યાત ગેંગસ્ટર લોરેન્સ બિશ્નોઈ હાલમાં પોતાની સુરક્ષાને લઈને મોટા ખતરામાં ઘેરાયેલો છે. તપાસ એજન્સીઓ અને ગુપ્તચર અહેવાલો અનુસાર, પોલીસ હવે બિશ્નોઈના સંભવિત હુમલાઓ વિશે ચિંતિત નથી, પરંતુ જેલની ચાર દીવાલોની અંદર જ તેના પર વધતા જતા જીવલેણ જોખમને લઈને ગંભીર ચિંતા વ્યક્ત કરી રહી છે. વર્ષોથી હત્યા, ખંડણી અને ગેંગવોર જેવી અનેક ગુનાહિત પ્રવૃત્તિઓમાં સંડોવાયેલા બિશ્નોઈનું નેટવર્ક પંજાબથી લઈને રાજસ્થાન, હરિયાણા અને દિલ્હી સુધી ફેલાયેલું છે. આ વિશાળ નેટવર્કના વિસ્તરણની સાથે જ ગુનાહિત જગતમાં તેની દુશ્મનોની યાદી પણ ઘણી લાંબી થતી ગઈ છે, જે હવે તેના માટે જ જીવનું જોખમ બની રહી છે.
લોરેન્સ બિશ્નોઈના જીવન માટે સૌથી મોટો ખતરો તેની સાથે સંકળાયેલા જૂના સાથીદારો અને આંતરરાષ્ટ્રીય સ્તરે સક્રિય ગેંગસ્ટરો તરફથી ઊભો થયો છે. એક સમયના તેના સૌથી વિશ્વાસુ સાથીદારો ગૌલ્ડી બ્રાર અને રોહિત ગોદારા સાથેના સંબંધોમાં આવેલા તિરાડ અને છૂટાછેડાએ ગુનાહિત સિંડિકેટના સમીકરણો બદલી નાખ્યા છે. સિદ્ધુ મૂસેવાલા અને વિકી મિદુખેડાની હત્યા બાદ પંજાબ, હરિયાણા અને દિલ્હીના ગેંગવોરમાં દુશ્મનાવટની આગ વધુ ભડકી હતી. આ ઉપરાંત, વિદેશી ધરતી પરથી પોતાની ગેંગ ચલાવતા કુખ્યાત ગુનેગારો પણ હવે ખુલ્લેઆમ બિશ્નોઈ સામે પડકાર ફેંકી રહ્યા છે, જેના કારણે જેલની અંદર અને બહાર બંને જગ્યાએ તેની સુરક્ષા સામે પ્રશ્નાર્થ ચિહ્ન સર્જાયું છે.
બિશ્નોઈના આ નાકાબંદી કરનાર ટોચના દુશ્મનોમાં ગોલ્ડી બ્રાર, રોહિત ગોદારા, વિદેશથી ગેંગ ઓપરેટ કરતો લકી પાતિયાલ અને અર્શ ડલ્લા જેવા કુખ્યાત નામો સામેલ છે. આ સાથે જ હરિયાણાનો કુખ્યાત કૌશલ ચૌધરી, દિલ્હીનો નીരજ બવાના, બિશ્નોઈને પાકિસ્તાનથી ખુલ્લો પડકાર ફેંકનાર શહેઝાદ ભાટી, કુખ્યાત બામ્બિહા ગેંગ તેમજ અમેરિકામાં એફબીઆઈ દ્વારા પકડાયેલા હિમાંશુ ભાઉ અને નીરજ ફરિદપુરિયા જેવા ગુનેગારો પણ તેના જાનના દુશ્મન બન્યા છે. આ તમામ ગેંગસ્ટરો અને જૂથો એકબીજા સાથે હાથ મિલાવીને કે સ્વતંત્ર રીતે બિશ્નોઈના સામ્રાજ્યને નેસ્તનાબૂદ કરવા માટે સક્રિય છે, જેણે કડક સુરક્ષા વ્યવસ્થામાં રહેતા લોરેન્સ બિશ્નોઈની મુશ્કેલીઓમાં ભારે વધારો કરી દીધો છે.
