દેવભૂમિ દ્વારકા જિલ્લાના કલ્યાણપુર તાલુકા અંતર્ગત આવતા કાનપર શેરડી ગામે તાજેતરમાં તણાવપૂર્ણ સ્થિતિ જોવા મળી હતી. ગામના સ્થાનિક તળાવની અંદર ખાનગી વીજ કંપનીના કોન્ટ્રાકટર દ્વારા વીજ પોલ (વીજ થાંભલા) ઊભા કરવાની કામગીરી હાથ ધરવામાં આવી હતી. આ કામગીરી શરૂ થતાં જ ગામના જાગૃત રહીશો અને ગ્રામજનોમાં ભારે રોષ ફેલાયો હતો. તળાવ જેવી જાહેર મિલકત અને પાણીના સ્ત્રોત સમાન જગ્યાએ વીજ પોલ નાખવાથી ગામના હિતોને નુકસાન થશે તેવી આશંકા સાથે લોકોએ એકત્રિત થઈને આ કામગીરીનો સખત વિરોધ નોંધાવ્યો હતો.
આ વિરોધ પ્રદર્શન દરમિયાન સ્થળ પર ખાનગી વીજ કંપનીના કોન્ટ્રાકટરના માણસો અને ગ્રામજનો વચ્ચે ઉગ્ર બોલાચાલી અને ઘર્ષણ સર્જાયું હતું. બંને પક્ષો વચ્ચે થયેલી બોલાચાલી અને તંગદિલીનો આખો માહોલ મોબાઈલના કેમેરામાં કેદ થઈ ગયો હતો, જે બાદ આ ઘટનાનો વીડિયો સોશિયલ મીડિયા પર વાયરલ થતાં સમગ્ર પંથકમાં ચર્ચાનો વિષય બન્યો છે. ગ્રામજનોનું સ્પષ્ટપણે કહેવું છે કે જાહેર ઉપયોગના તળાવમાં આ પ્રકારે વીજ પોલ ઊભા કરવાથી ગામલોકોની સુખાકારી જોખમાઈ શકે છે અને તેથી આ કામગીરી તાત્કાલિક ધોરણે અટકાવવી જોઈએ.
ઘટનાની ગંભીરતા જોતાં સ્થાનિક પ્રશાસન અને સબંધિત વિભાગે આ મામલે હસ્તક્ષેપ કરવો પડે તેવી સ્થિતિનું નિર્માણ થયું છે. ગ્રામજનોએ એકસંપ થઈને વીજ કંપનીની મનમાની સામે મોરચો ખોલ્યો છે અને જ્યાં સુધી આ અંગે કોઈ યોગ્ય ર્નિણય કે વૈકલ્પિક વ્યવસ્થા ન થાય ત્યાં સુધી વિરોધ ચાલુ રાખવાની ચીમકી ઉચ્ચારી છે. આ સમગ્ર ઘટનાને કારણે કાનપર શેરડી ગામે થોડા સમય માટે અફરાતફરીનો માહોલ સર્જાયો હતો અને વીજ કંપની તથા સ્થાનિકો વચ્ચેનો આ વિવાદ આગામી દિવસોમાં વધુ વરઘાડે ચડે તેવાં એંધાણ વર્તાઈ રહ્યા છે.
