ન્યૂઝીલેન્ડ સામે રમાયેલી રોમાંચક ચોથી T20 મુકાબલામાં ભારતીય ટીમને હારનો સામનો કરવો પડ્યો હતો. આ મેચમાં કીવી બેટ્સમેનો સામે ભારતીય બોલરો લાચાર નજરે પડ્યા હતા અને મેદાન પર રનની વર્ષા થઈ હતી. જોકે, આ મુશ્કેલ પરિસ્થિતિ વચ્ચે પણ યુવા ફાસ્ટ બોલર અર્શદીપ સિંહે પોતાની ધારદાર બોલિંગથી સૌનું ધ્યાન ખેંચ્યું હતું. તેણે પોતાની ચાર ઓવરના સ્પેલમાં 38 રન આપીને કિવી ટીમ સામે સંયમ જાળવી રાખ્યો હતો અને મહત્વની એક વિકેટ ઝડપી હતી. ભલે આ મેચનું પરિણામ ભારતની તરફેણમાં ન રહ્યું, પરંતુ અર્શદીપ માટે આ મેચ તેના કરિયરની સૌથી યાદગાર મેચોમાં સ્થાન પામી ગઈ છે.
આ મેચ દરમિયાન ન્યૂઝીલેન્ડના કેપ્ટન મિશેલ સેન્ટનરને આઉટ કરીને અર્શદીપે T20 આંતરરાષ્ટ્રીય ક્રિકેટમાં પોતાની 150 વિકેટોનો આંકડો પૂર્ણ કર્યો હતો. આ સિદ્ધિ હાંસલ કરવાની સાથે જ તે T20I ક્રિકેટમાં 150 વિકેટ ઝડતનારો ભારતનો સર્વપ્રથમ અને એકમાત્ર ફાસ્ટ બોલર બની ગયો છે. આ ઉપરાંત, ચાલુ કેલેન્ડર વર્ષમાં શાનદાર પ્રદર્શન જારી રાખતા તેણે T20I ફોર્મેટમાં કુલ 40 વિકેટ પોતાના નામે કરી છે, જે એક કેલેન્ડર વર્ષમાં કોઈપણ ખેલાડી દ્વારા લેવામાં આવેલી સૌથી વધુ વિકેટો છે. તેની આ સતત સફળતા ભારતીય બોલિંગ આક્રમણની મજબૂતાઈ દર્શાવે છે.
અર્શદીપ સિંહે માત્ર આટલેથી જ સંતોષ ન માનતા વધુ બે અદ્ભુત વૈશ્વિક વિક્રમો પણ પોતાના નામે કર્યા હતા. તેણે માત્ર 2,143 બોલ ફેંકીને 150 વિકેટ પૂર્ણ કરી છે, જે T20I ક્રિકેટમાં સૌથી ઓછા બોલમાં આ સિદ્ધિ મેળવનાર બોલરનો વર્લ્ડ રેકોર્ડ છે. એટલું જ નહીં, તેણે પોતાના ડેબ્યૂથી માત્ર 1,577 દિવસના ટૂંકા સમયગાળામાં જ આ 150 વિકેટો ઝડપી લીધી છે, જે અત્યાર સુધીનો સૌથી ઝડપી (સૌથી ઓછા દિવસોમાં) સમય છે. આ ઐતિહાસિક સિદ્ધિઓ સાથે અર્શદીપ સિંહે વૈશ્વિક ક્રિકેટ જગતમાં ભારતનું ગૌરવ વધાર્યું છે અને સાબિત કરી દીધું છે કે તે વર્તમાન સમયના સૌથી ખતરનાક અને પ્રભાવશાળી ઝડપી બોલરોમાંનો એક છે.
