શુક્રવારના રોજ ફિલિપાઈન્સના સક્રિય જ્વાળામુખી માઉન્ટ મયોનમાં અચાનક થયેલા વિસ્ફોટે સમગ્ર વિસ્તારમાં ચિંતાનું મોજું ફેલાવી દીધું છે. ફિલિપાઈન ઇન્સ્ટિટ્યુટ ઓફ વોલ્કેનોલોજી એન્ડ સિસ્મોલોજી (PHIVOLCS) ના જણાવ્યા અનુસાર, આ વિસ્ફોટ લગભગ છ મિનિટ સુધી ચાલ્યો હતો અને તેના કારણે આકાશમાં ૩ કિલોમીટર સુધી રાખ અને ધૂમાડો ફેલાઈ ગયો હતો, જે ધીમે ધીમે નૈઋત્ય દિશા તરફના વસ્તીવાળા વિસ્તારો તરફ સરકી રહ્યો છે. સદ્નસીબે આ ઘટનામાં કોઈ જાનહાની કે મોટા નુકસાનના તાત્કાલિક અહેવાલ નથી, પરંતુ સંભવિત જોખમને ધ્યાનમાં રાખીને સત્તાવાળાઓએ જ્વાળામુખીના ક્રેટરથી છ કિલોમીટરની ત્રિજ્યામાં આવતા જોખમી વિસ્તારોમાંથી લોકોને તાત્કાલિક સુરક્ષિત સ્થળે ખસી જવા સૂચના આપી છે.
આ ખતરનાક ગતિવિધિને કારણે વૈજ્ઞાનિક સંસ્થાઓએ જ્વાળામુખીનું એલર્ટ લેવલ પાંચમાંથી વધારીને ત્રણ પર પહોંચાડી દીધું છે. નિષ્ણાતોના મતે માઉન્ટ મયોન હવે મેગ્મેટિક વિસ્ફોટના એક નવા તરણમાં પ્રવેશી ચૂક્યો છે, જેના કારણે આગામી દિવસો અને અઠવાડિયામાં લાવા વહેવાની અને અત્યંત જોખમી પાયરોક્લાસ્ટિક પ્રવાહો (પીડીસી) ફેલાવાની શક્યતાઓ અનેકગણી વધી ગઈ છે. સ્થાનિક પ્રશાસન અને આપત્તિ વ્યવસ્થાપન ટીમો દ્વારા નાગરિકોને લાવા, ખડકોના પ્રવાહ અને ઝેરી ગેસથી દૂર રહેવા સતત ચેતવણી આપવામાં આવી રહી છે. તેમજ વિમાન ચાલકોને પણ આ સંવેદનશીલ ક્ષેત્રની આસપાસ ઉડાણ ન ભરવાની કડક સલાહ આપવામાં આવી છે.
મનિલાથી આશરે ૩૩૦ કિલોમીટર અગ્નિ દિશામાં આવેલો ૨,૪૬૨ મીટર ઊંચો માઉન્ટ મયોન તેના સચોટ શંકુ આકાર માટે જગવિખ્યાત છે અને તે દેશના સૌથી વધુ સક્રિય જ્વાળામુખીઓમાં સ્થાન ધરાવે છે. પેસિફિક 'રિંગ ઓફ ફાયર' પર આવેલું હોવાને કારણે ફિલિપાઈન્સમાં ભૂકંપ અને જ્વાળામુખી ફાટવાની ઘટનાઓ અવારનવાર બનતી રહે છે, જેમાં વર્ષ ૧૯૯૧નો માઉન્ટ પિનાટુબોનો વિસ્ફોટ સૌથી વિનાશક માનવામાં આવે છે. અગાઉ જૂન ૨૦૨૩માં પણ આ જ જ્વાળામુખીની અસ્થિરતાને કારણે ૧૨,૦00 થી વધુ લોકોને સલામત સ્થળે ખસેડવા પડ્યા હતા. વર્તમાન પરિસ્થિતિને ધ્યાનમાં રાખીને સરકાર અને રાહત ટીમો કોઈપણ આકસ્મિક પરિસ્થિતિને પહોંચી વળવા માટે સંપૂર્ણપણે સજ્જ છે.
