મહેસાણા શહેરમાં બાળકોના શિક્ષણ, પોષણ અને સર્વાંગી વિકાસને વેગ આપવાના હેતુસર મહાનગરપાલિકા દ્વારા અત્યાધુનિક સુવિધાઓથી સજ્જ સ્માર્ટ આંગણવાડીઓનું નિર્માણ કરવામાં આવ્યું છે. અગાઉ જર્જરિત અને ભાડાના મકાનોમાં ધમધમતી જૂની આંગણવાડીઓને બદલે સ્માર્ટ સિટીના અભિગમ હેઠળ આ ભવનો ઊભા કરાયા છે. જેમાં બાળકોને આકર્ષિત કરે તેવા રંગરોગાન, અદભુત થ્રી-ડી પેઇન્ટિંગ્સ અને ઉત્તમ ભૌતિક સુવિધાઓનો સમાવેશ થાય છે. ખાસ કરીને શોભાસણ રોડ સહિતના વિવિધ વિસ્તારોમાં આ ભવનોનું બાંધકામ પૂર્ણ થઈ ચૂક્યું છે, છતાં લાંબા સમયથી તે બંધ હાલતમાં જોવા મળી રહ્યા છે.
નવનિર્મિત અને આકર્ષક દેખાતી આ આંગણવાડીઓની બહાર યોગ્ય જાળવણીના અભાવે હાલમાં બેદરકારી સ્પષ્ટપણે વર્તાઈ રહી છે. ભવનોની આસપાસ સૂકા પાંદડાઓનો કચરો જમા થઈ ગયો છે અને કેટલીક જગ્યાએ તો હજુ પણ બાંધકામની બચેલી સામગ્રી વેરવિખેર પડેલી છે. લાખો રૂપિયાના જનતાના ટેક્સના નાણાં ખર્ચીને તૈયાર કરાયેલાં આ ભવનો જો યોગ્ય સમયે ઉપયોગમાં ન આવે, તો સરકારી યોજનાઓનો મૂળ હેતુ જ નિષ્ફળ સાબિત થાય છે. આ પ્રકારે કેન્દ્રો તૈયાર હોવા છતાં બાળકોને પ્રવેશ ન મળવાને કારણે સ્થાનિક વાલીઓ અને નાગરિકોમાં તંત્ર સામે ભારે રોષ અને સવાલો ઉઠી રહ્યા છે કે આ ભવનો આખરે ક્યારે ધમધમતા થશે.
આ સમગ્ર મામલે જ્યારે જવાબદાર મહાનગરપાલિકાના અધિકારીઓનો સંપર્ક સાધવામાં આવ્યો ત્યારે તેમણે સ્પષ્ટતા કરતા જણાવ્યું હતું કે મકાનોમાં વીજળી કે પાણી જેવી કેટલીક નાની-મોટી યુટિલિટી સંબંધિત કામગીરી આખરી તબક્કામાં બાકી છે. આ બાકી રહેલા કાર્યોને ટૂંક સમયમાં જ પૂર્ણ કરીને આધુનિક આંગણવાડીઓ સંબંધિત વિભાગને સત્તાવાર સંચાલન માટે સોંપવામાં આવશે. તંત્ર દ્વારા ટૂંક સમયમાં કામ પૂરૂં કરવાનો દાવો કરાઈ રહ્યો છે, પરંતુ વાસ્તવિકતા એ છે કે જ્યાં સુધી દરવાજા નહીં ખૂલે ત્યાં સુધી મહેસાણાના ભૂલકાંઓ આ સ્માર્ટ સુવિધાઓનો લાભ મેળવવાથી વંચિત જ રહેશે.
