મહેસાણા જિલ્લાના બહુચરાજી નગરપાલિકા અને ગુજરાત અર્બન લાઇવલીહૂડ મિશનના સંયુક્ત ઉપક્રમે 'હર ઘર સ્વદેશી, ઘર-ઘર સ્વદેશી' અભિયાનને વેગ આપવા માટે સ્થાનિક મેળાના મેદાનમાં એક વિશેષ સ્વદેશી મેળાનો પ્રારંભ કરવામાં આવ્યો છે. વડાપ્રધાન નરેન્દ્ર મોદીના 'આત્મનિર્ભર ભારત'ના સ્વપ્નને સાકાર કરવા અને 'લોકલ ફોર વોકલ'ના મંત્રને જન-જન સુધી પહોંચાડવાના ઉદ્દેશ્ય સાથે યોજાયેલા આ મેળાનું ઉદ્ઘાટન ધારાસભ્ય ડૉ. સુખાજી ઠાકોરના વરદ્ હસ્તે દીપ પ્રાગટ્ય દ્વારા કરવામાં આવ્યું હતું. આ પ્રસંગે સ્થાનિક અગ્રણીઓ અને નગરજનો મોટી સંખ્યામાં ઉપસ્થિત રહીને આ રાષ્ટ્રવાદી પહેલને વધાવી લીધી હતી.
મેળાના ઉદ્ઘાટન સમારોહ દરમિયાન શહેર ભાજપ પ્રમુખ દેવાંગ પંડ્યા અને નગરપાલિકા પ્રમુખ નરેન્દ્રભાઈ પટેલે પ્રાસંગિક ઉદ્બોધન કરતા જણાવ્યું હતું કે તહેવારોની મોસમમાં નાગરિકો જો સ્વદેશી વસ્તુઓની ખરીદી કરવાને પ્રાથમિકતા આપે, તો આપણા દેશના સ્થાનિક કારીગરો અને શ્રમિકોના જીવનમાં મોટો બદલાવ આવી શકે છે. તેમણે આગામી દિવાળીના તહેવારોમાં વિદેશી વસ્તુઓનો બહિષ્કાર કરી સ્વદેશી ચીજવસ્તુઓ અપનાવવા અને તે દ્વારા સ્થાનિક અર્થતંત્રને વધુ મજબૂત બનાવવાની દિશામાં સહયોગ આપવા માટે નગરજનોને હાર્દિક અનુરોધ કર્યો હતો.
આ મેળાની વિશેષતા વિશે માહિતી આપતા નગરપાલિકાના ચીફ્ ઑફિસર પ્રેરકભાઈ પટેલે જણાવ્યું હતું કે સ્થાનિક હસ્તકલા અને કુટીર ઉદ્યોગોને વેગ આપવા માટે મેળામાં ૧૪થી વધુ આકર્ષક સ્ટોલ શરૂ કરવામાં આવ્યા છે. જેમાં હાથબનાવટની સુંદર ચીજવસ્તુઓ, લોકપ્રિય હસ્તકલાની કૃતિઓ, સ્વાદિષ્ટ પાપડ સહિતની ખાદ્ય ચીજવસ્તુઓ, આકર્ષક વસ્ત્રો, રમકડાં અને કટલરી જેવી અનેક ઉપયોગી સામગ્રીઓ ઉપલબ્ધ છે. ખાસ કરીને સ્થાનિક કારીગરોને આર્થિક રીતે સક્ષમ બનાવવા માટે તંત્ર દ્વારા આ તમામ સ્ટોલ તદ્દન વિનામૂલ્યે ફાળવવામાં આવ્યા છે, જેનાથી વેપારીઓમાં ભારે ઉત્સાહ જોવા મળી રહ્યો છે.
