કેન્દ્રીય તપાસ એજન્સી CBIએ અરુણાચલ પ્રદેશના એક કાર્યકર્તાને વિદેશી સંસ્થાઓ દ્વારા મોકલવામાં આવેલા નાણાંની તપાસ તેજ કરી છે. ગત ઓગસ્ટ માસમાં નોંધાયેલી એફઆઈઆર (FIR) મુજબ, ફિલિપાઈન્સ, આયર્લેન્ડ અને યુકે સ્થિત ઓછામાં ઓછા ચાર વિદેશી સંગઠનો દ્વારા વિદેશી ફંડિગ રેગ્યુલેશન એક્ટ (FCRA)ના નિયમોનું ઉલ્લંઘન કરીને આ નાણાં ટ્રાન્સફર કરવામાં આવ્યા હતા. આ મામલે એજન્સી દ્વારા સંબંધિત દેશોની સંસ્થાઓ પાસેથી લેવડ-દેવડની વિગતો માંગવામાં આવી શકે છે, સાથે જ અન્ય કોઈ સ્થાનિક વ્યક્તિઓને પણ આ પ્રકારે ફંડ મળ્યું છે કે નહીં તેની પણ ઊંડાણપૂર્વક તપાસ ચાલી રહી છે.
CBIની પ્રાથમિક તપાસમાં ખુલાસો થયો છે કે બેંક ખાતાના વ્યવહારોનું વિશ્લેષણ કરતાં સંબંધિત કાર્યકર્તાને વિદેશી હૂંડિયામણ (Forex) સ્વરૂપે કુલ 20.9 લાખ રૂપિયા મળ્યા હતા. આ નાણાં મેળવવાનો વાસ્તવિક હેતુ ગુપ્ત રાખવામાં આવ્યો હતો અને પ્રાપ્ત થયેલી રકમ મોટાભાગે UPI વ્યવહારો દ્વારા ખર્ચવામાં આવી હતી. એફઆઈઆર (FIR)માં ગંભીર આક્ષેપ કરવામાં આવ્યો છે કે આ વિદેશી ભંડોળનો ઉપયોગ અરુણાચલ પ્રદેશમાં સિઆંગ અપર મલ્ટીપર્પઝ પ્રોજેક્ટ અને દિબાંગ મલ્ટીપર્પઝ હાઇડ્રોપાવર પ્રોજેક્ટ સામે વિરોધ પ્રદર્શનો યોજવા તથા તેને ટકાવી રાખવા માટે થઈ રહ્યો છે.
આ કેસમાં સંડોવાયેલી વિદેશી સંસ્થાઓમાં ફિલિપાઈન્સ સ્થિત બાગુઈઓ સિટીમાં રજિસ્ટર્ડ 'એશિયા ઇન્ડિજિનસ પીપલ્સ નેટવર્ક ઓન એક્સટ્રેક્ટિવ ઇન્ડસ્ટ્રીઝ એન્ડ એનર્જી' ઉપરાંત ડબલિન સ્થિત 'ફ્રન્ટ લાઇન', ફિલિપાઈન્સની 'ઇન્ડિજિનસ પીપલ્સ રાઇટ્સ ઇન્ટરનેશનલ' અને લંડનની 'બિઝનેસ એન્ડ હ્યુમન રાઇટ્સ રિસોર્સ સેન્ટર'નો સમાવેશ થાય છે. આ તમામ સંગઠનો આદિવાસી સમુદાયોના અધિકારોના નામે કાર્યરત હોવાનો દાવો કરે છે, પરંતુ આ પ્રકારે અનિયમિત અને બિનઅધિકૃત નાણાકીય સહાયથી દેશના આર્થિક અને વ્યૂહાત્મક હિતોને વિપરીત અસર પહોંચતી હોવાથી તપાસ એજન્સીઓ વધુ સતર્ક બની છે.
