અમેરિકાની મિલિટરી ઇન્ટેલિજન્સ એજન્સી દ્વારા ચીનના અત્યંત ગોપનીય એવા શેનલોંગ સ્પેસ પ્લેનની એક નવી અને ચોંકાવનારી તસવીર જાહેર કરવામાં આવી છે. આ તસવીર સામે આવતા જ દુનિયાભરના વૈજ્ઞાનિકો અને સંરક્ષણ બાબતોના નિષ્ણાતોની નજર ચીનની આ ગુપ્ત અંતરીક્ષ પ્રવૃત્તિઓ પર સ્થિર થઈ ગઈ છે. આ ફરીથી વાપરી શકાય તેવું સ્પેસક્રાફ્ટ ભ્રમક્ષણ કક્ષામાં અન્ય સેટેલાઇટ સાથે ડોક્ડ થયેલું જોવા મળ્યું છે, જેના કારણે તેના મિશન અને ડિઝાઇન વિશે અત્યાર સુધી વણઉકેલાયેલા રહેલા ઘણા રહસ્યો પરથી થોડો પડદો હટ્યો છે.
આ સ્પષ્ટ તસવીર 2024માં એક કોમર્શિયલ ઇમેજિંગ સેટેલાઇટ દ્વારા કેપ્ચર કરવામાં આવી હતી. ડિફેન્સ ઇન્ટેલિજન્સ એજન્સીના રિપોર્ટ મુજબ, આ ફોટો વન્ટોરના વર્લ્ડવ્યુ-3 સેટેલાઇટે લગભગ 90 કિલોમીટર એટલે કે 56 માઈલના અંતરેથી 4.5 સેન્ટિમીટર પ્રતિ પિક્સેલના રિઝોલ્યુશન સાથે ખેંચ્યો હતો. આ તસવીરમાં શેનલોંગના ડેલ્ટા-આકારના વિંગ્સ, નીચેનો ભાગ, પાછળના ભાગમાં આવેલા સોલાર એરે અને ખુલ્લા પેલોડ બે ડોર્સ સ્પષ્ટપણે નજરે પડે છે. આ સ્પેસ પ્લેન જે બીજા સેટેલાઇટ સાથે જોડાયેલું છે, તેના સોલાર પેનલ્સ પણ ખુલ્લા છે, જોકે આ બીજા સેટેલાઇટની ઓળખ હજુ સુધી ગુપ્ત રાખવામાં આવી છે.
ચીન દ્વારા આ શેનલોંગ સ્પેસ પ્લેનની ક્ષમતાઓ અને તેના મિશનના હેતુઓ વિશે ક્યારેય ખાસ કોઈ માહિતી બહાર પાડવામાં આવી નથી. આ સ્પેસક્રાફ્ટ અત્યાર સુધીમાં 2020માં પહેલું, 2022માં 9 મહિનાનું અને ડિસેમ્બર 2023માં શરૂ થયેલું લગભગ 268 દિવસ લાંબુ મિશન પૂરું કરી ચૂક્યું છે. અમેરિકન એજન્સીના જણાવ્યા મુજબ આ સ્પેસ પ્લેને ભ્રમક્ષણ કક્ષામાં કોઈ ઓબ્જેક્ટને રિલીઝ કરીને તેની સાથે ઇન્ટરેક્ટ કર્યું હતું. હાલ તો આ તસવીરના કારણે ચીનની સ્પેસ ટેકનોલોજી અને તેની ગુપ્ત પ્રવૃત્તિઓ સામે આવ્યા બાદ અંતરીક્ષ સુરક્ષાને લઈને ચર્ચાઓનું જોર વધી ગયું છે.
