ન્યુ દિલ્હીમાં યોજાયેલી એક નેશનલ કોન્ફરન્સમાં બોલતા કોમર્સ એન્ડ ઇન્ડસ્ટ્રી મિનિસ્ટર પીયૂષ ગોયલે દાવો કર્યો હતો કે ભારત અને યુએસ વચ્ચેની દ્વિપક્ષીય ટ્રેડ ડીલ દેશના દરેક સંવેદનશીલ હિતોનું પૂરું ધ્યાન રાખશે. તેમણે જણાવ્યું કે જ્યારે આ ડીલની તમામ વિગતો પબ્લિક કરવામાં આવશે, ત્યારે દેશની જનતા તેના વખાણ કરશે કારણ કે તેનાથી ખેડૂતો કે અન્ય કોઈ સ્ટેકહોલ્ડર્સના હિતો સાથે કોઈ સમજૂતી કરવામાં આવી નથી. વિરોધ પક્ષો દ્વારા આ કરાર પર સવાલો ઉઠાવવા પાછળ વિષયનું અજ્ઞાન અને પૂરતી સમજ ન હોવાનું કહીને તેમણે કોંગ્રેસના વિરોધને ફગાવી દીધો હતો અને કહ્યું હતું કે ડીલની હજુ પૂરી વિગતો બહાર આવી નથી છતાં વિરોધ થઈ રહ્યો છે.
આગળ વાત કરતા તેમણે જણાવ્યું કે ફેબ્રુઆરીમાં યુએસ સાથે બાયલેટરલ ટ્રેડ એગ્રીમેન્ટના પહેલા તબક્કાની રૂપરેખા ફાઇનલ થઈ હતી, પરંતુ યુએસમાં ટેરિફ લેન્ડસ્કેપ બદલાતા ફરીથી નેગોશિએશન્સ ચાલી રહ્યા છે. ભારત યુએસ માર્કેટમાં બાંગ્લાદેશ, વિયેતનામ અને કંબોડિયા જેવા સ્પર્ધક દેશોની સરખામણીમાં પોતાના ગુડ્સ માટે ઓછા ટેરિફ મેળવવાનો પ્રયાસ કરી રહ્યું છે. ગોયલે ભૂતકાળમાં આરસીઇપી (Regional Comprehensive Economic Partnership) ડીલમાંથી ભારત બહાર ખસી ગયું હતું તેનો ઉલ્લેખ કરતા જણાવ્યું કે જો ભારત તેમાં જોડાયું હોત તો દેશનું મેન્યુફેક્ચરિંગ સેક્ટર બરબાદ થઈ જાત અને ભારત માત્ર ચાઇનીઝ ગુડ્સ વેચનાર સેલ્સમેન બનીને રહી જાત. તેમણે એમ પણ કહ્યું કે સરકારે ગત 2014 પહેલાના સમય કરતાં વધુ મજબૂત વ્યાપારી નીતિઓ અપનાવી છે.
વધુમાં તેમણે જણાવ્યું કે ક્વોલિટી, ગ્લોબલ માર્કેટ એક્સેસ અને ઇન્ક્લુઝિવિટી એ ભારતની ઇન્ડસ્ટ્રીયલ સફરના ચાર મુખ્ય સ્તંભ છે. સરકારની નવી ટ્રેડ પોલિસીના કારણે આજની તારીખમાં અંદાજે 60 ટ્રિલિયન ડૉલર જીડીપી ધરાવતા દેશો સાથે પ્રિફરન્શિયલ માર્કેટની તકો ખુલી છે, જે 2014 પહેલા માત્ર 10 ટ્રિલિયન ડૉલર હતી. જર્મની સાથે થયેલા માઇગ્રેશન એગ્રીમેન્ટનો ઉલ્લેખ કરતા તેમણે કહ્યું કે દુનિયાભરમાં ભારતીય ટેલેન્ટ અને સ્કીલ્સની ભારે ડિમાન્ડ છે. ક્લાયમેટ ચેન્જ મુદ્દે વાત કરતા તેમણે સ્પષ્ટ કર્યું કે ભારતે તેની ગ્રીન એનર્જી કેપેસિટી વધારીને 60 ટકા સુધી પહોંચાડી દીધી છે, છતાં એનર્જી સિક્યુરિટી માટે કોલસાનું મહત્વ પણ યથાવત રાખ્યું છે.
