આણંદ જિલ્લાના સોજિત્રા તાલુકાના ડભોઉ, મલાતજ, દેવાતળપદ તેમજ વસો તાલુકાના પેટલી અને દેવાવાંટા ગામોના તળાવોમાં છેલ્લા ઘણા વર્ષોથી મોટી સંખ્યામાં મગરો વસવાટ કરે છે. આ ગામોના તળાવોમાં મગરો જાણે ગામના નાગરિકોની જેમ જ રહેતા હોય અને અત્યાર સુધી એક પણ મગરે નાગરિકોને ઈજા કે નુકસાન પહોંચાડ્યું ન હોવાની વિશેષ વાત સામે આવી છે. જો કે, આ મગરોની સુરક્ષા અને ક્યારેક તેઓ ઈજાગ્રસ્ત થાય કે માનવ વસ્તીમાં આવી ચડે ત્યારે યોગ્ય સારવાર મળી રહે તે માટે એક અદ્યતન સેન્ટરની તાતી જરૂરિયાત હતી. આ બાબતને ધ્યાનમાં રાખીને સોજિત્રાના ધારાસભ્ય વિપુલ પટેલે મુખ્યમંત્રી ભૂપેન્દ્ર પટેલ સમક્ષ રજૂઆત કરી હતી, જેને પગલે મુખ્યમંત્રીએ તાત્કાલિક અસરથી આ પ્રોજેક્ટને મંજૂરી આપી છે.
આ રજૂઆતના પરિણામે સમગ્ર રાજ્યમાં પ્રથમ વખત મગરો માટે ખાસ રેસ્ક્યૂ સેન્ટરનું નિર્માણ થવા જઈ રહ્યું છે, જેના માટે અંદાજે 50 લાખ રૂપિયાનો ખર્ચ ફાળવવામાં આવ્યો છે. સોજિત્રા તાલુકાના દૂધીપુરા ખાતે 1 હેક્ટર જેટલા વિશાળ વિસ્તારમાં આ રેસ્ક્યૂ સેન્ટર બનાવવાનો નિર્ણય લેવામાં આવ્યો છે, જેમાં મગરોને ત્વરિત સારવાર મળી રહે તે માટે આધુનિક સંસાધનો અને તમામ જરૂરી વ્યવસ્થાઓ ઉપલબ્ધ કરાવવામાં આવશે. આ ઉપરાંત, સોજિત્રા વિધાનસભા મતવિસ્તારના ડભોઉ, મલાતજ અને દેવાતળપદ ગામે પ્રવાસન વિભાગ દ્વારા ક્રોકોડાયલ પાર્કનું પણ દિવસ-રાત નિર્માણ કાર્ય ચાલી રહ્યું છે, જેથી આસપાસના 100 થી વધુ ગામોના તળાવોમાં રહેતા મગરોને સુરક્ષિત રાખી શકાય.
મધ્ય ગુજરાતના આ વિસ્તારોમાં ક્રોકોડાયલ પાર્ક અને રેસ્ક્યૂ સેન્ટર વિકસિત થવાથી આખી ભૌગોલિક કાયાપલટ થઈ જશે. અહીં મગરોને જોવા માટે દૂર-દૂરથી પ્રવાસીઓ આવશે, જેના કારણે સ્થાનિક ગ્રામીણ કક્ષાએ રોજગારીની નવી તકો ઊભી થશે અને નાના-મોટા ધંધા-વ્યવસાયોને વેગ મળશે. આ પ્રોજેક્ટના સાકાર થવાથી માત્ર વન્યજીવ સંરક્ષણ જ નહીં પરંતુ આજુબાજુના વિસ્તારમાં પાયાની સુવિધાઓ પણ ઉપલબ્ધ થશે અને પ્રવાસન ક્ષેત્રે આ પ્રદેશ નવું નજરાણું બનશે.
