સોશિયલ મીડિયા પર હાલમાં એક એવો કિસ્સો વાયરલ થઈ રહ્યો છે જેણે લોકોની માનસિકતા અને ડિલિવરી બોય જેવા ફ્રન્ટલાઈન વર્કર્સ પ્રત્યેના વ્યવહાર પર ગંભીર સવાલો ખડા કર્યા છે. રીતિકા નામની એક યુવતીએ ઓનલાઇન પ્લેટફોર્મ સ્વિગી દ્વારા દૂધ, દહીં, ડુંગળી અને ટમેટા જેવી રોજિંદી જરૂરિયાતોની વસ્તુઓ મંગાવી હતી, જેની કિંમત માત્ર 300 રૂપિયા જેટલી હતી. આ ઓર્ડર તેની સોસાયટીના જ બીજા ટાવરના એક ખોટા ફ્લેટમાં ભૂલથી ડિલિવર થઈ ગયો હતો. જ્યારે સમયસર સામાન હાથમાં ન આવ્યો ત્યારે રીતિકાએ ડિલિવરી પાર્ટનરનો સંપર્ક કર્યો અને તેને જાણ થઈ કે ઓર્ડર તો ક્યારનોય ડિલિવર બતાવી રહ્યો છે.
જ્યારે રીતિકા તે ખોટા ફ્લેટ પર પહોંચી અને સામાન પાછો માંગ્યો ત્યારે સામેવાળી મહિલાનું વર્તન જોઈને સૌ કોઈ દંગ રહી ગયા. જે મહિલાને ભૂલથી સામાન મળ્યો હતો તેણે તો સામાન વાપરવાની પણ તૈયારી કરી લીધી હતી અને ઉલટાનું એવું કહ્યું કે આ તમારી જ ભૂલ છે, તમે પાર્સલ અમને કેમ આપ્યું? આ અસંવેદનશીલ જવાબ સાંભળીને રીતિકાનો પિત્તો ગયો અને તેણે ગુસ્સામાં એવું કહી દીધું કે, તમે 1 કરોડ રૂપિયાના ફ્લેટમાં રહો છો પણ હરકતો ઝૂંપડપટ્ટીવાળા જેવી કરો છો, થોડી તો કોમન સેન્સ વાપરો. આ નાની બાબતે બંને મહિલાઓ વચ્ચે ઘણું ઘર્ષણ થયું અને આખો મામલો સોશિયલ મીડિયા પર ચર્ચાનો વિષય બન્યો છે.
આ નાની ઘટના આપણને એ શીખવે છે કે ઓનલાઇન ઓર્ડરની આવી નાની ભૂલો ડિલિવરી બોયના જીવન પર કેટલી ભારે પડી શકે છે. જો ગ્રાહક આવી ભૂલ પર કંપનીમાં ફરિયાદ કરે તો પેલા બિચારા ડિલિવરી પાર્ટનરનું રેટિંગ બગડી શકે છે, તેમનો બોનસ કપાઈ શકે છે અને ક્યારેક નોકરી પણ જોખમમાં મૂકાઈ શકે છે. દિવસ-રાત આપણી સેવા કરતા આ ફ્રન્ટલાઈન વર્કર્સ થોડા માન અને સમજૂતીના હકદાર છે, અને તેમની મુશ્કેલીઓને સમજીને માનવીય અભિગમ અપનાવવો એ દરેક નાગરિકની ફરજ છે.
