દલ સ્ટ્રીટ પર જિઓ પ્લેટફોર્મ્સ લિમિટેડે શાનદાર ડેબ્યુ કર્યું છે, જેમાં બીએસઇ અને એનએસઇ પર શેર 1,359 રૂપિયાના ભાવે લિસ્ટ થયો હતો જે તેના 1,119 રૂપિયાની આઈપીઓ પ્રાઇસ કરતા 21.36% ના પ્રીમિયમ પર છે. આ 30,213 કરોડ રૂપિયાનો પબ્લિક ઇશ્યુ 22.19 ગણો સબસ્ક્રાઇબ થયો હતો, જે અત્યાર સુધીનો ભારતનો સૌથી મોટો આઈપીઓ છે અને આ સાથે રિલાયન્સ સપોર્ટેડ આ ડિજિટલ સર્વિસ બિઝનેસનું વેલ્યુએશન 10 લાખ કરોડ રૂપિયાથી વધુ પહોંચી ગયું છે. એનએસઇ પર બેલ-રિંગિંગ સેરેમની પહેલાં જ્યારે ઈશા, આકાશ અને અનંત અંબાણીએ પરિવારના સંઘર્ષ અને જિઓ સફર વિશે વાત કરી, ત્યારે નીતા અંબાણીની બાજુમાં બેઠેલા 69 વર્ષના મુકેશ અંબાણી ભાવુક થઈ ગયા હતા અને આ પ્રસંગ રિલાયન્સ માટે છેલ્લા 2 દાયકામાં પહેલું મોટું લિસ્ટિંગ બન્યો હતો.
આ કાર્યક્રમમાં રિલાયન્સ રિટેલ વેન્ચર્સના એક્ઝિક્યુટિવ ડિરેક્ટર ઈશા અંબાણીએ પરિવારના જૂના દિવસોને યાદ કરતા જણાવ્યું કે કેવી રીતે 1977માં જ્યારે મુકેશ અંબાણી 20 વર્ષના હતા ત્યારે તેમના દાદા ધીરુભાઈ અંબાણીએ કંપનીને પબ્લિકમાં લાવી હતી. અનંત અંબાણીએ ખુલાસો કર્યો કે જિઓનો વિચાર સૌથી પહેલાં ઈશાના મગજમાં આવ્યો હતો જેને આકાશ અંબાણીએ આગળ ધપાવ્યો હતો. આકાશ અંબાણીએ જણાવ્યું કે આ આઈપીઓને 1.3 કરોડ એપ્લિકેશન્સ દ્વારા 7.5 લાખ કરોડ રૂપિયાની જબરદસ્ત ડિમાન્ડ મળી હતી અને લોન્ચ થયાના માત્ર 95 મિનિટમાં જ આખો ઇશ્યુ ફુલ્લી સબસ્ક્રાઇબ થઈ ગયો હતો. સવારે 10 વાગ્યે અંબાણી પરિવારની નવી પેઢીએ સાથે મળીને બેલ વગાડ્યો હતો અને સવારે 11.01 વાગ્યા સુધીમાં જિઓ પ્લેટફોર્મ્સના શેર 21.42% વધીને 1,358.7 રૂપિયા પર ટ્રેડ થઈ રહ્યા હતા.
જિઓ પ્લેટફોર્મ્સના મેનેજિંગ ડિરેક્ટર 35 વર્ષના આકાશ અંબાણીએ આ લિસ્ટિંગને ફિનિશ લાઇન નહીં પરંતુ સ્ટાર્ટ લાઇન ગણાવતા કહ્યું કે આગામી દાયકામાં તેમનો હેતુ એઆઈ, ક્લાઉડ, કનેક્ટેડ ડિવાઇસિસ અને સ્પેસ કનેક્ટિવિટી જેવી ટેકનોલોજીને સામાન્ય લોકો સુધી પહોંચાડીને ભારતને માત્ર ગ્રાહક નહીં પરંતુ ટેકનોલોજીના સર્જક બનાવવાનો છે. દાદી કોકિલાબેન, માતા-પિતા અને ભાઈ-બહેનોની ઉપસ્થિતિમાં આકાશે વચન આપ્યું કે નવી પેઢીનો ઉદ્દેશ્ય માત્ર વારસાને જાળવવાનો નથી, પરંતુ જિઓને ભારત માટે વધુ મોટું અને અર્થપૂર્ણ બનાવવાનો છે. કંપનીના આ ભવ્ય પ્રદર્શન અને પરિવારની ભાવનાત્મક ક્ષણોએ દેશભરના બિઝનેસ જગતમાં મોટું આકર્ષણ જમાવ્યું છે.
