ન્યુ દિલ્હીમાં એક ઇન્ટરવ્યુ દરમિયાન પૂર્વ સુપ્રીમ કોર્ટના જજ સંજય કિશન કૌલે બેફામ નિવેદન આપતા જણાવ્યું છે કે ભારતમાં ગુનો સાબિત થાય કે છોડી દેવાય તે પહેલાનો જે સમય હોય છે તે જ એક પ્રકારની સજા બની જાય છે. ઉમર ખાલીદ અને શરજીલ ઇમામને જામીન ન મળવાની બાબત પર બોલતા તેમણે કહ્યું કે લાંબી કાનૂની પ્રક્રિયાઓ જ પોતે એક સજાનું સ્વરૂપ ધારણ કરી લે છે અને સામાન્ય સંજોગોમાં જામીન મળવા જ જોઈએ. તેમણે સ્વીકાર્યું કે કેટલાક એક્ટ એવા છે જે ચોક્કસ કેસોમાં જામીન આપવા પર રોક લગાવે છે, પરંતુ સામાન્ય રીતે તેમનો દ્રષ્ટિકોણ જામીન બાબતે હંમેશા લિબરલ રહ્યો છે.
આ મુદ્દે વધુ વાત કરતા તેમણે જસ્ટિસ સુંદરશ સાથેના પોતાના એક ચુકાદાનો ઉલ્લેખ કર્યો હતો, જેમાં કસ્ટડી અને જામીનના સિદ્ધાંતો વિશે ઊંડાણપૂર્વક ચર્ચા કરવામાં આવી હતી. કૌલ અને સુંદરશની બેન્ચે એ વાત પર ભાર મૂક્યો હતો કે મોટાભાગના કેસોમાં જામીન એ જ નિયમ હોવો જોઈએ. ઉલ્લેખનીય છે કે ઉમર ખાલીદ અને શરજીલ ઇમામ ફેબ્રુઆરી 2020માં થયેલા નોર્થઈસ્ટ દિલ્હી રાયટ્સના કથિત મોટા Conspiracy કેસમાં UAPA હેઠળ આરોપી છે. દિલ્હી પોલીસ સ્પેશિયલ સેલ દ્વારા નોંધવામાં આવેલી FIR 59/2020 મુજબ, આ હિંસામાં 53 લોકોના મોત થયા હતા અને 700થી વધુ લોકો ઘાયલ થયા હતા, જે વિરોધ પ્રદર્શનો દરમિયાન ફાટી નીકળી હતી.
આ કેસમાં આ વર્ષે 5 જાન્યુઆરીના રોજ સુપ્રીમ કોર્ટે ઉમર ખાલીદ અને શરજીલ ઇમામના જામીન ફગાવી દીધા હતા, અને સપ્ટેમ્બરમાં દિલ્હી હાઈકોર્ટે પણ તેમની અરજી રદ કરી હતી. કોર્ટે અવલોકન કર્યું હતું કે પુરાવા અને પ્રોસીક્યુશનના કેસના આધારે બંને આરોપીઓ અલગ જ સ્થિતિમાં ઊભા છે. બીજી તરફ, જસ્ટિસ સંજય કિશન કૌલનું આગામી સંસ્મરણ પુસ્તક 'Without Fear or Favour' આગામી 31 ઓક્ટોબરના રોજ રિલીઝ થવાનું છે, જે તેમણે જય વિનાયક ઓઝા સાથે મળીને લખ્યું છે. કૌલના આ નિવેદને દેશભરમાં લાંબી ચાલતી કાનૂની પ્રક્રિયાઓ અને અંડર-ટ્રાયલ કેદીઓના જામીનને લઈને ફરી એકવાર મોટી ચર્ચા છેડી દીધી છે.
