ભારતના રક્ષા મંત્રી રાજનાથ સિંહ બુધવારે ફિલિપાઇન્સના સેબુ શહેરમાં પહોંચ્યા હતા, જ્યાં તેઓ 13મી એસીયન ડિફેન્સ મિનિસ્ટર્સ મીટિંગ-પ્લસ (ADMM-Plus) માં ભાગ લઈ રહ્યા છે. આ મહાસંમેલનની સાઇડલાઈન્સ પર તેમણે યુએસ વોર સેક્રેટરી પીટ હેગસેથ સાથે ખાસ બેઠક યોજી હતી. સેબુ એરપોર્ટ પર પહોંચતા જ રાજનાથ સિંહનું શાનદાર સેરેમોનિયલ સ્વાગત કરવામાં આવ્યું હતું, જેમાં ફિલિપાઇન્સના નેશનલ ડિફેન્સ વિભાગના અંડરસેક્રેટરી મેજર જનરલ ફેબિયન એમ પેડ્રેગોસા અને ફિલિપાઇન્સમાં ભારતના રાજદૂત હર્ષ કુમાર જૈન સહિતના અધિકારીઓ ઉપસ્થિત રહ્યા હતા. એરપોર્ટ બાદ હોટેલ પહોંચીને રક્ષા મંત્રીએ સ્થાનિક ભારતીય સમુદાય અને ફિલિપાઇન્સના નાગરિકો સાથે પણ મુલાકાત કરી હતી.
આ મુલાકાત દરમિયાન બંને નેતાઓએ યુએસ-ઇન્ડિયા મેજર ડિફેન્સ પાર્ટનરશિપના ફ્રેમવર્કની પહેલી વર્ષગાંઠની ઉજવણી કરી હતી. સોશિયલ મીડિયા પર પોસ્ટ શેર કરીને યુએસ વોર સેક્રેટરી પીટ હેગસેથે ભારતના રક્ષા મંત્રી સાથેની બેઠકને ખૂબ જ સકારાત્મક ગણાવી હતી અને ડિફેન્સ ક્ષેત્રે સહયોગ વધારવા પર ભાર મૂક્યો હતો. નોંધનીય છે કે 2025માં સહી થયેલું આ 10 વર્ષનું ફ્રેમવર્ક બંને દેશોના રક્ષા સંબંધોને એક નવો જ આયામ આપી રહ્યું છે, જેનો મુખ્ય ઉદ્દેશ્ય ડિફેન્સ ક્ષેત્રે એક સમાન વિઝન અને પોલિસી તૈયાર કરવાનો છે. આ બેઠક ઉપરાંત યુએસ વોર સેક્રેટરીએ સાઉથ કોરિયા, ઓસ્ટ્રેલિયા અને જપાનના પ્રતિનિધિઓ સાથે પણ દ્વિપક્ષીય બેઠકો યોજી હતી.
ગુરુવારે રાજનાથ સિંહ સત્તાવાર રીતે એસીયન મિટિંગમાં ભારતનું પ્રતિનિધિત્વ કરશે અને પ્રાદેશિક તથા આંતરરાષ્ટ્રીય સુરક્ષાના મુદ્દાઓ પર પોતાનું વક્તવ્ય આપશે. સેબુ રવાના થતા પહેલા જ રક્ષા મંત્રીએ સ્પષ્ટ કર્યું હતું કે ભારત એસીયન સાથેના સંબંધો મજબૂત કરવા અને ઇન્ડો-પેસિફિક રીજનમાં શાંતિ તથા સ્થિરતા જાળવવા માટે સંપૂર્ણપણે કટિબદ્ધ છે. આ મિટિંગ દરમિયાન તેઓ જપાન, ઓસ્ટ્રેલિયા, સાઉથ કોરિયા, સિંગાપોર, વિયેતનામ અને યજમાન દેશ ફિલિપાઇન્સ સહિતના અનેક દેશોના મંત્રીઓ સાથે દ્વિપક્ષીય ચર્ચાઓ પણ કરશે.
