બનાવની વિગતો મુજબ આ ઘટના મંગળવારે બપોરે 4:30 વાગ્યાની આસપાસ બેંગલુરુના વાઈટફિલ્ડ રૂટ પર દોડતી મેટ્રો ટ્રેનમાં બની હતી. સૌપિકા નામની આ યુવતી જ્યારે મેટ્રોમાં સવાર હતી ત્યારે એક સાથી પેસેન્જરે તેની કોઈ પણ પરવાનગી વગર ગુપ્ત રીતે તેનો વીડિયો બનાવવાનું શરૂ કરી દીધું હતું. આઘાતજનક બાબત એ હતી કે આ ઘટના બની ત્યારે યુવતીએ સંપૂર્ણ કપડાં પહેરેલા હતા અને તેના શરીરનું કોઈ પણ અંગ ખુલ્લું ન હતું. યુવતીએ તરત જ આ હરકત પકડી લીધી અને જાહેરમાં પેલા વ્યક્તિને ઘેરીને સવાલ જવાબ કરવાનું શરૂ કરી દીધું હતું કે તે શા માટે તેનો વીડિયો રેકોર્ડ કરી રહ્યો હતો.
યુવતી દ્વારા સોશિયલ મીડિયા પર શેર કરવામાં આવેલા વિડિયોમાં તે ખુબ જ ડરેલી અને ધ્રૂજતી નજરે પડી રહી છે, પરંતુ તેણે હિંમત હારી નહીં. વીડિયોમાં મેટ્રોના સિક્યુરિટી જવાનો પણ નજરે પડી રહ્યા છે જ્યારે યુવતી આરોપીનો ફોન માંગતી દેખાય છે. જોકે, જ્યારે ટ્રેન સ્ટેશન પર ઊભી રહી ત્યારે આરોપી મોકો જોઈને ફોન ઝૂંટવીને ત્યાંથી ભાગી છૂટવામાં સફળ રહ્યો હતો. યુવતીએ જણાવ્યું હતું કે તે મેટ્રો ઓથોરિટી પાસે પહોંચી હતી અને તેમને આખી ઘટનાની જાણ કરીને સત્તાવાર ફરિયાદ નોંધાવી હતી, જ્યાં તેને 7 દિવસમાં ફોલો-અપ લેવાનું આશ્વાસન મળ્યું હતું.
આ મામલો સોશિયલ મીડિયા પર વાયરલ થયા બાદ બેંગલુરુ સિટી પોલીસ હરકતમાં આવી હતી અને યુવતીની પોસ્ટ પર પ્રતિક્રિયા આપીને વિગતો મંગાવી હતી. પોલીસે આ મામલે કાયદેસરની કાર્યવાહી કરતા સત્તાવાર રીતે પુષ્ટિ કરી છે કે આ કેસમાં FIR નોંધી દેવામાં આવી છે અને હાલમાં આગળની તપાસ ચાલી રહી છે. મેટ્રો જેવી પબ્લિક ટ્રાન્સપોર્ટ સિસ્ટમમાં મહિલાઓની સુરક્ષાને લઈને ફરી એકવાર ગંભીર સવાલો ઉભા થયા છે અને લોકો આરોપી સામે સખત કાર્યવાહીની માંગ કરી રહ્યા છે.
