રશિયાના તુલા રીઝનમાં આવેલા નોવોમોસ્કોવ્સ્ક શહેર પર યુક્રેને ડ્રોન હુમલો કર્યો હોવાના અહેવાલ સામે આવ્યા છે. રીઝનલ ગવર્નર દિમિત્રી મિલ્યાયેવે ટેલિગ્રામ પર માહિતી આપતા જણાવ્યું હતું કે આ હુમલા દરમિયાન તોડી પાડવામાં આવેલા ડ્રોનનો કાટમાળ શહેરના વિવિધ વિસ્તારોમાં પડ્યો હતો, જેના કારણે ઇન્ડસ્ટ્રિયલ ઇન્ફ્રાસ્ટ્રક્ચરને ગંભીર નુકસાન થયું છે. આ અચાનક થયેલા હુમલાથી સ્થાનિક લોકોમાં પણ ડરનો માહોલ જોવા મળ્યો છે.
આ હુમલાની તીવ્રતા એટલી વધારે હતી કે માત્ર ઇન્ડસ્ટ્રિયલ વિસ્તારો જ નહીં, પરંતુ સામાન્ય નાગરિકોના રહેણાંક વિસ્તારો પણ તેની ઝપેટમાં આવી ગયા હતા. પ્રાદેશિક અધિકારીઓ દ્વારા આપવામાં આવેલી વિગતો મુજબ ડ્રોનના પડતા કાટમાળને કારણે કેટલાક એપાર્ટમેન્ટ બિલ્ડિંગ્સ અને પ્રાઇવેટ હોમ્સને પણ નુકસાન પહોંચ્યું છે. ખાસ કરીને મોસ્કોથી આશરે 200 કિમી દક્ષિણમાં આવેલું આ નોવોમોસ્કોવ્સ્ક શહેર એક મોટું કેમિકલ પ્રોડક્શન હબ માનવામાં આવે છે, જેના કારણે આ હુમલો ખૂબ જ ચિંતાજનક સાબિત થયો છે.
ઘટનાની ગંભીરતાને ધ્યાનમાં રાખીને તુરંત જ રાહત અને બચાવ કામગીરી શરૂ કરી દેવામાં આવી છે. ગવર્નર મિલ્યાયેવે જણાવ્યું હતું કે પરિસ્થિતિનો તાગ મેળવવા અને સુરક્ષા સુનિશ્ચિત કરવા માટે લેબોરેટરીઝના એક્સપર્ટ્સ અને પબ્લિક હેલ્થ સેફ્ટી વોચડોગના અધિકારીઓની ટીમોને તાત્કાલિક અસરથી ઘટનાસ્થળે રવાના કરવામાં આવી છે. હાલ તંત્ર દ્વારા નુકસાનનું આકલન કરવામાં આવી રહ્યું છે અને આગામી સમયમાં સ્થિતિ કાબૂમાં લાવવા માટે વધુ કડક પગલાં લેવામાં આવશે.
