જાપાનમાં યોજાયેલી એશિયન Para ગેમ્સ પૂરી થયા બાદ ભારતીય બેડમિન્ટન જગતમાં એક મોટો વિવાદ સામે આવ્યો છે. દેશના ટોચના પેરા શટલર અને સ્ટાર ખેલાડી પ્રમોદ ભગતે નેશનલ કોચ ગૌરવ ખન્ના સામે સત્તાવાર રીતે મોરચો ખોલી દીધો છે. પ્રમોદે 27 ઓક્ટોબરના રોજ સાંજે 8.07 વાગ્યે સ્પોર્ટ્સ મિનિస్ట్రీના અધિકારીઓ, SAIના ED ટીમ્ઝ ડિવિઝન, DG SAI તેમજ બેડમિન્ટન એસોસિએશન ઓફ ઈન્ડિયા (BAI) ના પ્રમુખ અને સેક્રેટરી જનરલને ઈમેઈલ કરીને ફોર્મલ ફરિયાદ નોંધાવી છે. પ્રમોદનો આરોપ છે કે ફાઇનલ મેચના ઠીક પહેલા કોચ દ્વારા સોશિયલ મીડિયા પર કરવામાં આવેલી એક ભવિષ્યવાણીવાળી પોસ્ટના કારણે તેના પર ભારે માનસિક પ્રેશર આવી ગયું હતું, જેની સીધી અસર તેની ગેમ અને પર્ફોર્મન્સ પર પડી હતી.
ફરિયાદમાં જણાવ્યા અનુસાર, નેશનલ કોચ ગૌરવ ખન્નાએ 23 ઓક્ટોબરે રમાનાર ફાઇનલ પહેલા 22 ઓક્ટોબરે સોશિયલ મીડિયા પર એક પોસ્ટ શેર કરી હતી. જેમાં ભારત કુલ 16 મેડલ જીતશે તેવી ભવિષ્યવાણી કરવામાં આવી હતી. આ પોસ્ટમાં 2 ગોલ્ડ, 6 સિલ્વર અને 8 બ્રોન્ઝ મેડલની વાત હતી અને એવું અનુમાન લગાવવામાં આવ્યું હતું કે નીતેશ કુમાર અને નવીન શિવકુમાર ગોલ્ડ જીતશે, જ્યારે પ્રમોદ ભગતને સિલ્વર મેડલ મળશે. જોકે, ભારત આશા પ્રમાણે કુલ 16 મેડલ જીત્યું હતું પરંતુ ગોલ્ડ અને સિલ્વરનો આંકડો બદલાયો હતો. ભારતે 3 ગોલ્ડ, 5 સિલ્વર અને 8 બ્રોન્ઝ જીત્યા હતા. મેન્સ સિંગલ્સ SL3 ની ફાઇનલ મુકાબલામાં નીતેશ કુમારે સાથી ખેલાડી પ્રમોદ ભગતને હરાવીને ગોલ્ડ જીત્યો હતો, જ્યારે પ્રમોદને સિલ્વર મળ્યો હતો. મેચ પૂરી થયા બાદ કોચે આ પોસ્ટ ડિલીટ કરી દીધી હતી, પરંતુ પ્રમોદ પાસે તેનો સ્ક્રીનશોટ સુરક્ષિત હતો.
પ્રમોદ ભગતનું કહેવું છે કે જ્યારે તેને આ પોસ્ટ વિશે ખબર પડી ત્યારે તે ખૂબ જ શરમજનક સ્થિતિમાં મુકાઈ ગયો હતો કારણ કે અન્ય દેશોના ખેલાડીઓ અને ઓફિશિયલ્સ પણ આ બાબતે ચર્ચા કરી રહ્યા હતા. આ પ્રકારના વર્તનને ખેલાડીઓનું મનોબળ તોડનારું ગણાવીને પ્રમોદે કહ્યું કે આનાથી આંતરરાષ્ટ્રીય સ્તરે ટીમની યુનિટી અને ગરિમાને ઠેસ પહોંચી છે. તેણે BAI પાસે આ મામલે ગંભીર નોંધ લઈને ફોર્મલ ઇન્ક્વાયરી કરવાની અને નિયમો મુજબ યોગ્ય ડિસિપ્લિનરી એક્શન લેવાની માંગ કરી છે. આ ઘટનાએ મોટો સવાલ ખડો કર્યો છે કે શું ઇન્ટરનેશનલ મેચ ચાલુ હોય ત્યારે કોઈ કોચે પબ્લિકલી મેડલની ભવિષ્યવાણી કરવી જોઈએ ખરી? ખેલાડીઓનું કહેવું છે કે આવા સમયે ટીમ તરફથી માત્ર સપોર્ટ અને પ્રોત્સાહન જ મળવું જોઈએ.
