દેશમાં ઇંધણના વધતા ખર્ચ અને આયાતને લઈને કેન્દ્રીય મંત્રી નિતિન ગડકરીએ એક મોટું નિવેદન આપ્યું છે. તેમણે E20 ફ્યુઅલ અને ઇથેનોલનો ખુલ્લેઆમ બચાવ કરતા કહ્યું છે કે આ અંગે અગાઉ જેટલી પણ વાતો થઈ હતી તે બધી માત્ર પ્રોપગેન્ડા સિવાય કિંજૂન નહોતી. ગડકરીના મતે, જો દેશને આત્મનિર્ભર બનાવવો હોય તો અશ્મિભૂત ઈંધણ પરની નિર્ભરતા ઘટાડવી જ પડશે અને તેના માટે વૈકલ્પિક ઈંધણ જ એકમાત્ર અચૂક ઉપાય છે.
આજે ભારત સરકાર વિદેશી ક્રૂડ ઓઈલની આયાત પાછળ દર વર્ષે મસમોટી રકમ ખર્ચી રહી છે, જેનું કદ આશરે 22 લાખ કરોડ રૂપિયા સુધી પહોંચે છે. આ વિશાળ આયાત બિલને કાબૂમાં લાવવા માટે ગડકરીએ બાયો-બિટ્યુમેન, કચરામાંથી બનતી સામગ્રી, ઇથેનોલ, CBG એટલે કે કમ્પ્રેસ્ડ બાયો-ગેસ અને હાઇડ્રોજનથી ચાલતી ટ્રક તથા બસોના ઉપયોગ પર ભાર મૂક્યો છે. આ તમામ બાબતો માત્ર પર્યાવરણને જ શુદ્ધ નહીં રાખે, પરંતુ દેશમાં ક્લીન મોબિલિટીને પણ પ્રોત્સાહન આપશે.
આ સમગ્ર યોજનાના કેન્દ્રમાં દેશનો અન્નદાતા એટલે કે ખેડૂત છે. ગડકરીએ દાવો કર્યો છે કે આવનારા સમયમાં આપણા ખેડૂતો માત્ર અનાજ પકવનાર જ નહીં, પરંતુ ફ્યુઅલ, બિટ્યુમેન અને હાઇડ્રોજન પૂરા પાડનારા પ્રોવાઇડર પણ બનશે. આ પગલાથી ગ્રામીણ અર્થતંત્ર એટલું મજબૂત બનશે કે જીડીપીમાં ગામડાઓનું યોગદાન હાલના 12 ટકાથી વધીને સીધું 22 ટકા સુધી પહોંચી જશે, જેનાથી દેશમાં રોજગારીની નવી તકો પણ ઊભી થશે.
