મોસ્કોમાં મળેલી ગેસ-એક્સપોર્ટિંગ દેશોની સમિટમાં રશિયન પ્રેસિડેન્ટ વ્લાદિમીર પુતિને દુનિયાને સ્પષ્ટ ચેતવણી આપી છે કે રશિયાને વૈશ્વિક ગેસ માર્કેટમાંથી બહાર કાવાના કોઈપણ પ્રયાસના ગંભીર પરિણામો આવી શકે છે. મંગળવારે યોજાયેલી આ સમિટમાં પુતિને જણાવ્યું હતું કે રશિયા ગેસ સેક્ટરમાં સહકાર માટે હંમેશા તૈયાર છે અને સંસાધનોથી સમૃદ્ધ આર્કટિક વિસ્તારમાં અમેરિકન પાર્ટનર્સ સાથે કામ કરવાની સંભાવનાઓ પણ તપાસવામાં આવી રહી છે. ભૌગોલિક રાજકીય તણાવ અને પ્રતિબંધો વચ્ચે રશિયા ગ્લોબલ એનર્જી માર્કેટમાં પોતાનું સ્થાન મજબૂત રાખવા માટે સતત નવા રસ્તા શોધી રહ્યું છે.
આ સમિટ દરમિયાન પુતિને ગ્રીન એજન્ડા પર વધુ પડતો ભાર મૂકવા સામે વાંધો ઉઠાવતા કહ્યું કે એનર્જી પોલિસી એવી હોવી જોઈએ જે વિશ્વભરમાં ભરોસાપાત્ર સપ્લાય સુનિશ્ચિત કરી શકે. તેમણે રશિયાના ગેસ એક્સપોર્ટ ઈન્ફ્રાસ્ટ્રક્ચરને વધુ સારું બનાવવા અને એક્સપોર્ટ રૂટ્સને ઓપ્ટિમાઈઝ કરવાની જરૂરિયાત પર ભાર મૂક્યો હતો. પુતિને સ્પષ્ટ શબ્દોમાં કહ્યું કે આપણે ગેસનો સપ્લાય વધારવાની જરૂર છે અને વૈશ્વિક ખરીદદારો સુધી ગેસ પહોંચાડવા માટે મજબૂત ઈન્ફ્રાસ્ટ્રક્ચર તૈયાર કરવું પડશે. તેમણે આંતરરાષ્ટ્રીય સ્તરે તમામ ચાલુ સંઘર્ષોનો અંત લાવવા અને રશિયા પર લાદવામાં આવેલા પ્રતિબંધોને હટાવવાની પણ જોરਦાર માંગ કરી હતી.
પુતિનના આ નિવેદનો દર્શાવે છે કે તમામ પ્રકારના પ્રતિબંધો છતાં રશિયા દુનિયામાં એક મોટા ગેસ સપ્લાયર તરીકે પોતાની પકડ જાળવી રાખવા માટે કેટલી ગંભીર કોશિશ કરી રહ્યું છે. અમેરિકા સાથે આર્કટિક ક્ષેત્રમાં સંભવિત સહયોગના સંકેતો આપીને રશિયાએ વૈશ્વિક બજારમાં એક મોટો સંદેશ આપ્યો છે. આ પગલાંથી રશિયાને વૈકલ્પિક માર્કેટ્સ સુધી પહોંચવામાં અને વૈશ્વિક ઉર્જા ક્ષેત્રમાં પોતાની સ્થિતિ વધુ મજબૂત બનાવવામાં મોટી મદદ મળી શકે તેમ છે.
