રાજકોટ જિલ્લાના ધોરાજી વિસ્તારમાં આ વર્ષે મેઘરાજાની અનિશ્ચિતતા અને ઓછા વરસાદને કારણે ખેડૂતોની આશા પર પાણી ફરી વળ્યું છે. ચોમાસાની શરૂઆતથી જ વરસાદ ખેંચાતા કપાસ, મગફળી અને સોયાબિન જેવા મુખ્ય પાકોના ઉત્પાદન પર ભારે માઠી અસર જોવા મળી છે. પરિસ્થિતિ એવી બની છે કે ક્યાંક ખેતરોમાં પાક સાવ નિષ્ફળ ગયો છે તો ક્યાંક ઉત્પાદનમાં મોટો ઘટાડો નોંધાયો છે, જેના કારણે અન્નદાતાઓની આર્થિક સ્થિતિ કથળી ગઈ છે.
ચોમાસામાં ભારે નુકસાની વેઠ્યા બાદ હવે ખેડૂતોની નજર શિયાળુ પાક પર છે જેથી થોડી ઘણી ઘટ પૂરી કરી શકાય. પરંતુ હવે શિયાળુ વાવેતરના ટાંકણે જ વીજ સંકટના વાદળો ઘેરાયા છે. જો ખેડૂતોને પૂરતો વીજ પૂરવઠો નહીં મળે તો સમયસર વાવેતર થઈ શકશે નહીં અને જો વાવેતર થઈ જાય તો પણ અનિયમિત વીજળીના લીધે પાકના વિકાસ પર ખરાબ અસર પડી શકે છે. આ બેવડી મારની ભીતિથી ખેડૂતો અત્યારથી જ ચિંતિત બન્યા છે.
આ ગંભીર પરિસ્થિતિને ધ્યાનમાં રાખીને ખેડૂતો સ્પષ્ટ માગ કરી રહ્યા છે કે શિયાળુ સિઝન દરમિયાન તેમને કોઈપણ પ્રકારના વીજ કાપ વગર નિયમિત પૂરવઠો મળવો જોઈએ. ખેડૂતોને વધુ નુકસાનમાંથી બચાવવા માટે સરકારે તાત્કાલિક ધોરણે વીજ કંપનીઓ સાથે બેઠક કરીને યોગ્ય સંકલન કરવું જોઈએ અને આગોતરું આયોજન ગોઠવવું જોઈએ તેવી લોકમાગ જોર પકડી રહી છે.
