ગોંડલ તાલુકાના ચોરડી ગામની સીમમાં અસામાજિક તત્વો દ્વારા ધમધમાટ વિદેશી દારૂનું કટિંગ ચાલી રહ્યું હોવાની પાકી બાતમી ગ્રામ્ય એલસીબીની ટીમને મળી હતી. આ બાતમીના આધારે પોલીસે તાત્કાલિક ધોરણે ચોરડી ગામની સીમમાં આવેલ ઉર્જા ઇન્ડસ્ટ્રીયલ પાર્ક-1 ની અંદર શ્યામ સ્પાઇસ કારખાનાની બાજુની એક અવાવરૂ જગ્યા પર ઓચિંતો દરોડો પાડ્યો હતો. આ દરોડા દરમિયાન અલગ-અલગ ત્રણ વાહનોમાં છૂપી રીતે વિદેશી દારૂનું કટિંગ થતું હોવાનું સામે આવ્યું હતું, જેને પગલે પોલીસ ટીમ પણ ચોંકી ઉઠી હતી અને તાત્કાલિક કાર્યવાહી હાથ ધરી હતી.
પોલીસે આ દરોડામાં સ્થળ પરથી વિદેશી દારૂની કુલ 414 પેટીઓ જપ્ત કરી હતી, જેમાં આવેલી 4,986 બોટલોની કુલ કિંમત 35,79,336 રૂપિયા થાય છે. દારૂના આ મોટા જથ્થા ઉપરાંત ગુનામાં ઉપયોગમાં લેવાયેલા વાહનો જેમાં આઈસર, અશોક લેલેન્ડ માલવાહક વાહન અને એક ટોયોટા અર્બન ક્રુઝર કાર તથા 2 મોબાઈલ ફોન પણ કબજે કરવામાં આવ્યા છે, જેથી કુલ મુદ્દામાલ 55,89,336 રૂપિયા પર પહોંચ્યો છે. એલસીબીની પ્રાથમિક તપાસમાં આ દારૂનો જથ્થો મંગાવીને ખુલ્લેઆમ કટિંગ કરાવનાર સોહિલ સલીમભાઈ મડમ નામનો શખ્સ મુખ્ય સૂત્રધાર હોવાનું ખૂલ્યું છે, જે ચોરડી ગામનો જ રહેવાસી છે.
આ રેડ બાદ પોલીસે દારૂનો આ જથ્થો લાવનાર વાહનોના ચાલકો અને માલિકો તેમજ દારૂ મોકલનાર અજાણ્યા ઇસમો સામે પણ કાયદેસરની સખત તજવીજ શરૂ કરી દીધી છે. ઉચ્ચ પોલીસ અધિકારીઓના માર્ગદર્શન હેઠળ એલસીબીના પીઆઈ અને તેમની પોલીસ ટીમ દ્વારા આ સફળ ઓપરેશન પાર પાડવામાં આવ્યું હતું. હાલ તો પોલીસ દ્વારા આ મામલે ફરાર થયેલા સોહિલ સલીમભાઈ મડમ સહિતના પાંચેય આરોપીઓને ઝડપી પાડવા માટે ચક્રો ગતિમાન કરવામાં આવ્યા છે અને આગામી દિવસોમાં આ રેકેટના અન્ય મોટા ખુલાસા થવાની પૂરી શક્યતા છે.
