જયપુરના નહરગઢ પોલીસ સ્ટેશન વિસ્તારમાં સોમવારે બપોરે 4 વાગ્યાની આસપાસ એક એવી ઘટના બની જેણે બધાને ચોંકાવી દીધા છે. ચંપાલાલ નામના એક વેપારી પોતાની ભૂખ સંતોષવા માટે રસ્તાની બાજુમાં ગાડી ઊભી રાખીને 20 રૂપિયાની કચોરી ખાવા બેઠા હતા. તેમણે 20 લાખ રૂપિયાથી ભરેલી બેગ પોતાના સ્કૂટરની આગળ મૂકી હતી, પરંતુ તેમને ખબર નહોતી કે આ નાનકડો બ્રેક તેમને કેટલો મોંઘો પડવાનો છે. આ ઘટનાનો આખો સીસીટીવી વિડિયો હવે સોશિયલ મીડિયા પર જોરદાર વાયરલ થઈ રહ્યો છે, જેમાં આખી ચોરી સ્પષ્ટ નજરે પડે છે.
વાયરલ થયેલા વિડિયોમાં જોઈ શકાય છે કે ચંપાલાલ આરામથી પોતાના સ્કૂટર પર બેસીને કચોરીની મજા માણી રહ્યા છે. તે જ સમયે અન્ય એક સ્કૂટર પર હેલ્મેટ પહેરીને આવેલા બે શખ્સો તેમની બરાબર બાજુમાં ઊભા રહે છે અને પાછળ બેઠેલો શખ્સ પળભરમાં રોકડ ભરેલી બેગ ઉઠાવીને રફૂચક્કર થઈ જાય છે. હાથમાં કચોરી પકડેલી હોવા છતાં ચંપાલાલે તાત્કાલિક પેલા બંને ચોરોનો પીછો કર્યો હતો અને આસપાસના લોકોએ પણ તેમને પકડવા માટે દોડાદોડ કરી હતી, પરંતુ ચાલાક ચોરો આંખના પલકારામાં ત્યાંથી ભાગી છૂટવામાં સફળ રહ્યા હતા.
આ મામલે વેપારી ચંપાલાલની ફરિયાદના આધારે નહરગઢ પોલીસ સ્ટેશનમાં ગુનો નોંધીને કાયદેસરની કાર્યવાહી શરૂ કરવામાં આવી છે. પોલીસ હાલ આસપાસના વિસ્તારોના સીસીટીવી ફૂટેજ ખુંદાઈ રહી છે જેથી હેલ્મેટ પહેરેલા બંને આરોપીઓની ઓળખ કરીને તેમને જલદીથી ઝડપી પાડી શકાય. માત્ર 20 રૂપિયાના નાસ્તા પાછળ 20 લાખ રૂપિયા ગુમાવવાનો આ કિસ્સો હાલ આ વિસ્તારમાં ચર્ચાનો વિષય બન્યો છે.
