બીજિંગમાં બનેલી આ ઘટનામાં ફૂટબોલ સ્ટાર કિલિયન એમબાપે દ્વારા કમ્યુનિસ્ટ ચીનના સ્થાપક નેતા માઓ ઝેડોંગને ડિક્ટેટર કહેવા બદલ સોશિયલ મીડિયા પર જોરદાર વિરોધ થયો હતો. ફ્રેન્ચ ઓનલાઈન ટોક શો ધ બ્રિજ પહેલા વાયરલ થયેલા એક વિડિયો ક્લિપમાં એમબાપેને તેમના ફેવરીટ મીમ વિશે પૂછવામાં આવ્યું હતું, જેના જવાબમાં તેમણે એક ચીની ડિક્ટેટર વાળા મીમનો ઉલ્લેખ કર્યો હતો. આ વિડિયો સામે આવ્યા બાદ ચીનમાં ભારે રોષ ફેલાયો હતો અને સોશિયલ મીડિયા પર આ મુદ્દો ટોપ ટ્રેન્ડિંગમાં રહ્યો હતો, જ્યાં યુઝર્સે તેમની સામે ભારે નારાજગી વ્યક્ત કરી હતી.
આ વિવાદને કારણે એમબાપેને મોટો આર્થિક ફટકો પડ્યો છે અને બેવરેજ મેકર ડોંગપેંગ, ડેરી જાયન્ટ મેંગન્યુ તેમજ ચીઝ મેકર મિલ્કગ્રાઉન્ડ જેવી 3 મોટી ચીની કંપનીઓએ મંગળવારે તેમની સાથેના કરાર તાત્કાલિક ધોરણે રદ કરવાની જાહેરાત કરી દીધી છે. આ કંપનીઓએ સ્પષ્ટ કર્યું કે તેઓ રાષ્ટ્રીય ભાવનાઓને ઠેસ પહોંચાડનારા કોઈપણ શબ્દો કે કૃત્યોનો સખત વિરોધ કરે છે. આ ઉપરાંત, સોશિયલ મીડિયા પ્લેટફોર્મ રેડનોટે પણ એમબાપે સાથેનું કન્ટેન્ટ પાર્ટનરશીપ 31 ડિસેમ્બર, 2024ના રોજ પૂરું થઈ ગયુ હોવાનું જણાવીને પ્રમોશનલ મટીરિયલ્સ હટાવી લીધા છે અને તેમના એકાઉન્ટ પર નવા ફોલોઅર્સ ઉમેરવા પર પ્રતિબંધ મૂકી દીધો છે. ચીનના વિદેશ મંત્રાલયે પણ આ મામલે પ્રતિક્રિયા આપતા કહ્યું કે ચીની જનતાની લાગણીઓને ઠેસ પહોંચાડતી બાબતો સામે સમગ્ર સમાજ સંયુક્ત વિરોધ નોંધાવશે.
સ્થિતિ વણસતા કિલિયન એમબાપેએ મંગળવારે એક સત્તાવાર નિવેદન બહાર પાડીને સ્વીકાર્યું કે તેમનું નિવેદન બેજવાબદાર હતું અને તેનાથી ચીન તેમજ દુનિયાભરના ચીની સમુદાયના લોકોને ઠેસ પહોંચી છે. તેમણે સ્પષ્ટ કર્યું કે આવું કરવાનો તેમનો કોઈ ઈરાદો નહોતો અને તેઓ ચીનના લોકો તેમજ તેમના ઈતિહાસ પ્રત્યે ઊંડો આદર ધરાવે છે. સોશિયલ મીડિયા પર ચાલી રહેલા બોયકોટના ટ્રેન્ડ વચ્ચે એમબાપેની આ માફી કેટલી અસરકારક સાબિત થાય છે અને આગામી સમયમાં ચીની બજારો સાથેના તેમના સંબંધો કેવી રીતે સુધરે છે તે જોવું રહ્યું.
