ગુજરાત સરકારે હાલમાં જ રાજ્યના ચાર જિલ્લાઓને દુષ્કાળગ્રસ્ત જાહેર કરીને ખેડૂતો માટે સહાયની જાહેરાત કરી છે, પરંતુ આ જાહેરાત સામે ખેડૂતો અને નેતાઓમાં ભારે રોષ જોવા મળી રહ્યો છે. ખંભાળીયા ખાતે ગુજરાત કિસાન કોંગ્રેસના પ્રમુખ પાલભાઈ આંબલીયાએ સરકારના આ નિર્ણયને ખેડૂતો સાથેની ક્રૂર મજાક ગણાવ્યો છે. તેમણે સરકારની આ આર્થિક સહાયને અપૂરતી ગણાવીને તાત્કાલિક ધોરણે આ નિર્ણયમાં ફેરવિચારણા કરવાની કડક ચેતવણી આપી છે અને આગામી 12 નવેમ્બરથી ઉગ્ર આંદોલન કરવાની જાહેરાત કરી છે.
કિસાન નેતાએ જણાવ્યું હતું કે રાજ્ય સરકારે માત્ર હેક્ટરદીઠ 8500 રૂપિયા અને તે પણ માત્ર 2 હેક્ટરની મર્યાદામાં સહાય આપવાનું નક્કી કર્યું છે, જે અન્નદાતા સાથે સીધો અન્યાય છે. અગાઉ કોંગ્રેસના શાસન સમયમાં 150 ટકા પાક વીમો મળતો હતો અને એસ.ડી.આર.એફ. યોજનાના લાભો મળતા હતા, જે વર્તમાન સરકારે બંધ કરી દીધા છે. નિયમ મુજબ જ્યારે કોઈ વિસ્તારને દુષ્કાળગ્રસ્ત જાહેર કરવામાં આવે ત્યારે સરકાર માટે કેટલાક ફરજિયાત કાર્યો કરવાના હોય છે, પરંતુ તે દિશામાં કોઈ નક્કર કામગીરી દેખાતી નથી.
સરકાર સામે આંદોલનનો હુંકાર કરતા કિસાન કોંગ્રેસે કેટલીક મુખ્ય માંગણીઓ પણ મૂકી છે. જેમાં ખેડૂતોનું 3 લાખ રૂપિયા સુધીનું પાક ધિરાણ માફ કરવું, 7 કિલોમીટરની ત્રિજ્યામાં ઘાસ ડેપો ખોલવા, રાહતકામો શરૂ કરવા, પાંજરાપોળ અને ગૌશાળામાં પશુ સબસીડી આપવી તેમજ પીવાના શુદ્ધ પાણીની યોગ્ય વ્યવસ્થા કરવાની માંગ કરવામાં આવી છે. જો સરકાર દ્વારા આ મામલે જલ્દીથી કોઈ હકારાત્મક પગલાં ભરવામાં નહીં આવે, તો ખેડૂતોનો આ રોષ વધુ ઉગ્ર બનશે અને રસ્તા પર ઉતરીને સરકાર સામે મોટો વિરોધ નોંધાવવામાં આવશે.
