જર્મનીના ઉત્તર ભાગમાં આવેલા હેનોવર નજીકના ન્યુસ્ટેડ એમ રૂબેનબર્ગે વિસ્તારમાં સોમવારે રાત્રે મધ્યરાત્રિ પહેલાં એક ચોંકાવનારી ઘટના સામે આવી છે. અહીં એક BMW કારના ડ્રાઈવરે જાણી જોઈને રસ્તા પર ઉભેલા લોકોના એક ગ્રુપને ટક્કર મારી હતી. આ બનાવની જાણ થતાં જ સ્થાનિક પોલીસ તાત્કાલિક હરકતમાં આવી ગઈ હતી અને સમગ્ર વિસ્તારને કોર્ડન કરીને પુરાવા એકત્ર કરવાનું શરૂ કર્યું હતું. પ્રાથમિક તપાસમાં આ કોઈ અકસ્માત નહીં પરંતુ જાણી જોઈને કરવામાં આવેલો હુમલો હોવાનું સામે આવ્યું છે, જેના કારણે સ્થાનિક લોકોમાં ભારે ડર અને રોષ જોવા મળી રહ્યો છે.
આ હુમલામાં 4થી 5 લોકો ઈજાગ્રસ્ત થયા છે, જેને તાત્કાલિક હોસ્પિટલ ખસેડવામાં આવ્યા હતા. સદનસીબે કોઈપણ ઈજાગ્રસ્તની હાલત જોખમી નથી, જોકે કેટલાકને ગંભીર ઈજાઓ પહોંચી છે. ઘટનાસ્થળે પેટ્રોલિંગ કરી રહેલી પોલીસ ટીમે સમયસૂચકતા વાપરીને BMW કારને રોકવાનો પ્રયાસ કર્યો હતો અને ગાડી પર ફાયરિંગ પણ કર્યું હતું. પરંતુ, અંધારાનો લાભ લઈને આરોપીઓ કાર ત્યાં જ છોડીને પગપાળા નાસી છૂટ્યા હતા. પોલીસે આરોપીઓને ઝડપી પાડવા માટે હેલિકોપ્ટર અને પોલીસ ડોગ સ્કવોડની મદદથી મોટું સર્ચ ઓપરેશન શરૂ કર્યું છે, પરંતુ હજુ સુધી આરોપીઓનો કોઈ પત્તો લાગ્યો નથી.
પોલીસની પ્રાથમિક તપાસમાં એવું ખૂલીને સામે આવ્યું છે કે પીડિતો અને હુમલાખોરો એકબીજાને ઓળખતા હોઈ શકે છે અને આ કોઈ રેન્ડમ હુમલો નથી, પરંતુ પૂર્વ આયોજિત ટાર્ગેટ હતો. હાલ પોલીસે મેક્લેનહોર્સ્ટર સ્ટ્રીટ સહિતના માર્ગો પર ટ્રાફિક ડાયવર્ટ કર્યો છે અને સઘન તપાસ ચલાવી રહી છે. ઘટનાસ્થળેથી એક પંચ્ચર પડેલી બ્લુ BMW કાર અને તેની નજીકથી તૂટેલી બારીવાળી સિલ્વર મર્સिडीઝ પણ મળી આવી છે, જે આ કેસ સાથે જોડાયેલી છે કે નહીં તેની પણ તપાસ ચાલી રહી છે. હુમલા પાછળનો ચોક્કસ હેતુ શું હતો અને ફરાર આરોપીઓ ક્યાં છુપાયા છે તે જાણવા માટે પોલીસ જુદી જુદી દિશામાં તપાસ આગળ ધપાવી રહી છે.
