આજના સમયમાં જ્યારે મોટી-મોટી ટેક અને કોર્પોરેટ કંપનીઓમાં ખર્ચ ઘટાડવા માટે કર્મચારીઓની છટણી કરવાનો ટ્રેન્ડ ચાલી રહ્યો છે, ત્યારે 101 વર્ષ જૂની અમેરિકન ફ્લેવર્ડ સિરપ બનાવતી કંપની ટોરાનીએ એક અનોખો રાહ ચીંધ્યો છે. હાલમાં જ જ્યાં માઈક્રોસોફ્ટ દ્વારા એઆઈ ક્ષેત્રે મોટું રોકાણ કરવાના ભાગરૂપે આશરે 60,000 કર્મચારીઓને સ્વેચ્છિક પેકેજ આપીને છૂટા કરવાની તૈયારીઓ ચાલી રહી છે, ત્યારે ટોરાનીના CEO મેલાની ડુબેક્કોનું માનવું છે કે કંપનીઓ ખર્ચ ઘટાડવા માટે નોકરી કાપવા સિવાયના અન્ય રસ્તાઓ પણ શોધી શકે છે. તેમનું કહેવું છે કે કોઈપણ બિઝનેસ માટે કર્મચારીઓને છૂટા કરવા એ કોઈ અનિવાર્ય પરિસ્થિતિ નથી પરંતુ એક ચોક્કસ પસંદગી છે, જેની અસર કંપનીની આગળ વધવાની ક્ષમતા પર પણ પડે છે.
ટોરાની કંપનીના ઈતિહાસ પર નજર કરીએ તો, તેની ૧૦૧ વર્ષની સફરમાં કંપનીએ ક્યારેય કોઈ કર્મચારીને નોકરીમાંથી કાઢ્યા નથી. એપ્રિલ 2020માં જ્યારે કોવિડ મહામારી અને લોકડાઉનને કારણે કોફી શૉપ અને આઉટલેટ્સ બંધ રહેવાથી કંપનીનું રેવન્યુ એક જ મહિનામાં 20% ઘટી ગયું હતું અને કેલિફોર્નિયામાં નવી ફેક્ટરી બનાવવા માટે મોટું ધિરાણ લીધેલું હોવા છતાં કંપનીએ એકપણ કર્મચારીને છૂટા કર્યા નહોતા. આ મુશ્કેલ સમયમાં માર્કેટિંગ અને એડવર્ટાઈઝિંગનો ખર્ચ ઘટાડીને, બિઝનેસ ટ્રાવેલ પર રોક લગાવીને અને બિનજરૂરી ખર્ચાઓ કાપીને કંપનીએ કર્મચારીઓની નોકરી બચાવી લીધી હતી. આટલું જ નહીં, ફેક્ટરીનું સ્થળાંતર કરતી વખતે પણ કર્મચારીઓને લાંબો પ્રવાસ ન ખેંચવો પડે તે માટે સ્ટાફના ઘરના ઝિપ કોડનું મેપિંગ કરીને સેન લીન્ડ્રો ખાતે નવી જગ્યા પસંદ કરવામાં આવી હતી, જેથી 100% વર્કફોર્સ જળવાઈ રહે.
આજે આ કંપની માર્કેટ રિસર્ચ, સેલ્સ ફોરકાસ્ટિંગ અને ડિમાન્ડ પ્લાનિંગ માટે એઆઈ અને ઓટોમેશનનો भरपूर ઉપયોગ કરે છે, છતાં તેના કર્મચારીઓમાં કોઈ ડર નથી કારણ કે તેઓ જાણે છે કે ટેકનોલોજીનો ઉપયોગ સ્ટાફની નોકરી છીનવવા માટે નહીં પરંતુ તેમની કામ કરવાની ક્ષમતા વધારવા માટે થાય છે. આ વર્ષે 2026માં કંપનીનું રેવન્યુ $800 મિલિયનને પાર કરી જવાની અપેક્ષા છે અને છેલ્લા 35 વર્ષથી કંપની વાર્ષિક અંદાજે 20% ના દરથી ગ્રોથ કરી રહી છે. CEO મેલાની ડુબેક્કોનું સ્પષ્ટ માનવું છે કે કંપનીની અસલ તાકાત તેની ટીમ છે અને મુશ્કેલ સમયમાં કર્મચારીઓનો સાથ આપીને જ બિઝનેસ ફરીથી વેગ પકડી શકે છે.
