અરૂણાચલ પ્રદેશમાં ચીને કબ્જો કર્યો હોવાનો દાવો કરતો એક વિડિયો સોશિયલ મીડિયા પર વાયરલ થયા બાદ દેશના રાજકારણમાં ગરમાવો આવી ગયો છે. કેન્દ્રીય મંત્રી કિરેન રિજીજુએ મંગળવારે કોંગ્રેસ પાર્ટી પર આક્રમક પ્રહાર કરતા જણાવ્યું હતું કે કોંગ્રેસે ભારતીય સેનાની છબી ખરાબ કરવા માટે જાણી જોઈને આર્ટિફિશિયલ ઈન્ટેલિજન્સ એટલે કે AIથી તૈયાર કરેલો એક ફેક વિડિયો શેર કર્યો છે. રિજીજુએ સોશિયલ મીડિયા પ્લેટફોર્મ X પર પોસ્ટ કરીને કહ્યું કે આ એક દેશદ્રોહી કૃત્ય સમાન છે અને આપણા દુશ્મનો જેવા જ કારનામા છે, જેથી કોંગ્રેસ પાર્ટીએ દેશની માફી માગવી જ પડશે.
આ વિવાદની શરૂઆત સોમવારથી થઈ હતી જ્યારે કોંગ્રેસ નેતા રિતુ ચૌધરીએ એક પોસ્ટ શેર કરીને દાવો કર્યો હતો કે ચીને અરૂણાચલ પ્રદેશના આસફિલા, લોંગ્જુ અને તાક્સિંગ સર્કલ પર કબ્જો કરી લીધો છે અને સેનાને જરૂરી સાધનો મળતા નથી. આ દાવા સાથે સ્પિયર કોર્પ્સના લેફ્ટનન્ટ જનરલ ગિરીશ કાલિયાનો એક વિડિયો પણ જોડવામાં આવ્યો હતો. જોકે, મામલો ગરમાતા જ ભારતીય સેનાની ફેક્ટ-ચેક યુનિટે તાત્કાલિક સ્પષ્ટતા કરી હતી કે આ વાયરલ વિડિયો ડિજિટલી એડિટ કરેલો છે અને તેમાં અધિકારીના નામે ખોટા નિવેદનો જોડવામાં આવ્યા છે. સેનાએ જણાવ્યું કે આ અસલી ફુટેજ વાસ્તવમાં 27 ઓક્ટોબર 2023ના રોજ જમ્મુ-કાશ્મીરના કુપવાડામાં યોજાયેલી પ્રેસ બ્રીફિંગની હતી, જ્યાં તત્કાલીન મેજર જનરલ ગિરીશ કાલિયાએ નિયંત્રણ રેખા પર ઘૂસણખોરીના 10 પ્રયાસો નિષ્ફળ બનાવવા અને 27 આતંકવાદીઓને ઠાર મારવા અંગે વાત કરી હતી.
સેનાએ સ્પષ્ટ કર્યું કે તે સમયે અધિકારી દ્વારા અરૂણાચલ પ્રદેશમાં ચીનના કબ્જા કે સેનાને સપ્લાય રોકવા અંગે કોઈ જ વાત કરવામાં આવી નહોતી. સેનાની આ કડક સ્પષ્ટતા બાદ શાસક પક્ષના નેતાઓ વધુ આક્રમક બન્યા છે અને વિપક્ષ પર દુશ્મનોની ભાષા બોલવાનો આરોપ લગાવી રહ્યા છે. આ ઘટનાથી સોશિયલ મીડિયા પર ફેક ન્યૂઝ અને AI ટેક્નોલોજીના દુરુપયોગને લઈને ફરી એકવાર મોટો રાષ્ટ્રીય વિવાદ છેડાઈ ગયો છે.
