રાજકોટ શહેરમાં સોશિયલ મીડિયા પર લાઈક્સ અને વ્યુઝ મેળવવાની ઘેલછામાં યુવકો પોતાની સાથે અન્ય લોકોનો જીવ પણ જોખમમાં મૂકતા અચકાતા નથી. તાજેતરમાં શહેરના ટ્રાફિકથી સતત ધમધમતા એવા માધાપર ચોકડી વિસ્તારમાંથી એક ચોંકાવનારો બનાવ સામે આવ્યો છે. અહીં કેટલાક નબીરાઓએ જાહેરમાં બાઈક પર બેફામ સ્ટંટબાજી કરી હતી, જેનો વીડિયો હાલ સોશિયલ મીડિયામાં આગની જેમ વાયરલ થઈ રહ્યો છે. ટ્રાફિકના નિયમોને નેવે મૂકીને ચલાવવામાં આવતી આવી ગાડીઓ ગમે ત્યારે ગંભીર અકસ્માત સર્જી શકે છે તેમ છતાં આ યુવાનોને કોઈ જ ડર નહોતો દેખાઈ રહ્યો.
આ વીડિયો સામે આવ્યા બાદ સ્થાનિક લોકો અને વાહનચાલકોમાં રોષ ભભૂકી ઉઠ્યો છે. આજના સોશિયલ મીડિયાના યુગમાં માત્ર રિલ્સ કે ફોટો પડાવવા માટે જીવના જોખમે સ્ટંટ કરવાની ઘેલછા યુવાધન માટે જીવલેણ સાબિત થઈ રહી છે. માધાપર ચોકડી જેવા મહત્વના અને ભારે વાહનોની અવરજવર વાળા માર્ગ પર આ પ્રકારે બેદરકારીપૂર્વક વાહન ચલાવવું એ માત્ર ટ્રાફિક નિયમોનો ભંગ નથી, પરંતુ ખૂની ખેમત સમાન છે. આ પ્રકારના જોખમી કારનામા માત્ર સ્ટંટ કરનાર યુવકો માટે જ નહીં, પરંતુ રસ્તા પર ચાલતા નિર્દોષ રાહદારીઓ માટે પણ ભારે જોખમી સાબિત થઈ શકે છે.
આ ઘટના બાદ શહેરમાં રોડ સેફ્ટી અને ટ્રાફિક નિયમોના પાલનને લઈને મોટા સવાલો ઊભા થયા છે. સોશિયલ મીડિયા પર ફેમસ થવા માટે કાયદાની કિમવાત ન કરનારા આવા તત્વો સામે ટ્રાફિક પોલીસ દ્વારા લાલ આંખ કરવામાં આવે તેવી માંગ ઉઠી રહી છે. જો સમયસર આવા સ્ટંટબાજો સામે કડક કાર્યવાહી નહીં કરવામાં આવે તો ભવિષ્યમાં મોટી દુર્ઘટના સર્જાઈ શકે છે, જેથી નાગરિકોની સુરક્ષા માટે પોલીસ પ્રશાસને તાત્કાલિક ધોરણે યોગ્ય પગલાં લેવા અનિવાર્ય બન્યું છે.
