ઈન્ડિયન પ્રીમિયર લીગની આગામી સીઝન 2027 પહેલાં ચેન્નાઈ સુપર કિંગ્સએ પોતાની કોચિંગ ટીમમાં મોટો અને મહત્વનો ફેરફાર કર્યો છે. પાછલી ત્રણેય સીઝનમાં નબળા પ્રદર્શનથી મુશ્કેલીમાં મુકાયેલી યલો આર્મીએ હવે ઈંગ્લેન્ડના સફળ કોચ ગેરેથ બેટીને પોતાના નવા આસિસ્ટન્ટ કોચ તરીકે સામેલ કર્યો છે. ગેરેથ બેટી હવે ટીમના નવા હેડ કોચ ઝહીર ખાનની સાથે મળીને CSKને ફરી એકવાર ચેમ્પિયન બનાવવા માટે ખાસ રણનીતિ પર કામ કરશે, જેથી ટીમનું ખોવાયેલું ફોર્મ પાછું મેળવી શકાય.
ચેન્નાઈની ટીમ માટે છેલ્લા ત્રણ વર્ષ કંઈ ખાસ રહ્યા નથી અને 2023માં એમ.એસ. ધોનીની કપ્તાની હેઠળ આઈપીએલનો ખિતાબ જીત્યા બાદ ટીમે ઋતુરાજ ગાયકવાડને કપ્તાની સોંપી હતી. જોકે 2024, 2025 અને 2026ની સીઝનમાં ટીમ એક પણ વખત પ્લેઓફ સુધી પહોંચી શકી નહોતી, જેના કારણે સતત ત્રણ વર્ષ નિષ્ફળ ગયા બાદ 18 વર્ષથી ફ્રેન્ચાઈઝી સાથે જોડાયેલા દિગ્ગજ સ્ટીફન ફ્લેમિંગ સાથે CSKએ પોતાના રસ્તા અલગ કર્યા હતા અને ભારતના પૂર્વ સ્ટાર બોલર ઝહીર ખાનને નવા હેડ કોચ બનાવ્યા હતા.
ઝહીર ખાનની મદદ માટે સામેલ કરાયેલા ગેરેથ બેટી ઈંગ્લિશ કાઉન્ટી ક્રિકેટ ટીમ સરેના છેલ્લા પાંચ વર્ષથી હેડ કોચ રહ્યા છે અને 2022માં સરે સાથે જોડાયા બાદ તેણે પહેલા જ વર્ષે ટીમને ચેમ્પિયન બનાવી હતી. ત્યારબાદ 2023 તથા 2024માં પણ સતત ટાઈટલ જીતાડીને સરેને હેટ્રિક ચેમ્પિયન બનાવી હતી અને વર્ષ 2025માં પણ તેમની ટીમ રનર્સ-અપ રહી હતી, જેથી હવે આ અનુભવી કોચના આવવાથી ચેન્નાઈની ટીમ આગામી સીઝનમાં નવા જોશ સાથે મેદાન પર ઉતરશે તેવી ક્રિકેટપ્રેમીઓમાં આશા છે.
