ચીનની રાજધાની બેઈજિંગથી આવેલા તાજા આંકડા મુજબ સપ્ટેમ્બર મહિનામાં દેશના ઇન્ડસ્ટ્રિયલ પ્રોફિટમાં જોરદાર તેજી જોવા મળી છે. નેશનલ બ્યુરો ઓફ સ્ટેટિસ્ટિક્સ દ્વારા જાહેર કરવામાં આવેલા ડેટા અનુસાર, સપ્ટેમ્બરમાં ઇન્ડસ્ટ્રિયલ ફર્મ્નો નફો વાર્ષિક ધોરણે 14.4 ટકા વધ્યો છે, જે ઓગસ્ટ મહિનામાં માત્ર 4.2 ટકા જ હતો. આ સાથે જ ચાલુ વર્ષના પ્રથમ 9 મહિનામાં કુલ નફો 15.5 ટકા વધીને સામે આવ્યો છે, જે જાન્યુઆરીથી ઓગસ્ટના ગાળામાં 15.7 ટકા હતો. એક્સપોર્ટ પર નિર્ભર કંપનીઓ ગ્લોબલ ટ્રેડ પ્રેશર અને અનિશ્ચિતતાનો સામનો કરી રહી છે, જ્યારે સ્થાનિક બજારમાં ઘટેલી ખરીદશક્તિને કારણે કમાણીની રિકવરી પર અસર પડી રહી છે.
આ આંકડાઓમાં જુદા-જુદા સેક્ટરોની સ્થિતિમાં મોટો ભેદ જોવા મળ્યો છે, જે ચીનની અસંતુલિત ઇકોનોમી દર્શાવે છે. પ્રથમ 9 મહિનામાં કમ્પ્યુટર, કોમ્યુનિકેશન અને ઇલેક્ટ્રોનિક ઇક્વિપમેન્ટ મેન્યુફેક્ચરિંગ સેક્ટરનો નફો આશ્ચર્યજનક રીતે 103.8 ટકા ઉછળ્યો છે, જ્યારે ફર્નિચર મેન્યુફેક્ચરિંગ સેક્ટરમાં 51.3 ટકાનો મોટો ઘટાડો નોંધાયો છે. આ ઉપરાંત, દુનિયાની સૌથી મોટી ઇલેક્ટ્રિક વ્હીકલ એટલે કે EV બેટરી બનાવતી કંપની CATLનો નેટ પ્રોફિટ પણ તાજેતરના ક્વાર્ટરમાં ઘણો ઘટી ગયો છે. ઓટો સેક્ટરમાં મંદી અને માર્કેટની આક્રમક સ્પર્ધાને કારણે કંપનીઓના માર્જિન પર ભારે દબાણ જોવા મળ્યું છે. આ ઇન્ડસ્ટ્રિયલ પ્રોફિટના આંકડાઓમાં વાર્ષિક ઓછામાં ઓછા 20 મિલિયન યુઆન એટલે કે 3.0 મિલિયન ડોલરની રેવન્યુ ધરાવતી કંપનીઓને સામેલ કરવામાં આવે છે.
સમગ્ર અર્થતંત્ર પર નજર કરીએ તો, ચીને ત્રીજા ક્વાર્ટરમાં અપેક્ષા કરતા વધુ 4.5 ટકાનો ગ્રોથ હાંસલ કર્યો છે, જેના કારણે તે પોતાના વાર્ષિક 4.5 થી 5.0 ટકાના ગ્રોથ ટાર્ગેટની નજીક પહોંચી ગયું છે. પરંતુ અલગ-અલગ સેક્ટરો વચ્ચેની અસમાનતા અને કમજોરી આગામી સમયમાં કોર્પોરેટ પ્રોફિટબિલિટી સામે મોટા પડકારો સર્જી શકે છે. જો ડોમેસ્ટિક કન્ઝમ્પ્શન નહીં સુધરે અને એક્સપોર્ટ માર્કેટમાં દબાણ ચાલુ રહેશે, તો ઇન્ડસ્ટ્રિયલ સેક્ટરની આ તેજી લાંબો સમય ટકવી મુશ્કેલ બની જશે. બિઝનેસ જગતની નજર હવે આગામી ત્રિમાસિક ગાળાના આંકડાઓ પર છે કે ચીન સરકાર આ અસંતુલનને દૂર કરવા માટે કેવા નવા પગલાં ભરે છે.
