સુરત જિલ્લાના બારડોલી તાલુકાના બાળાસરી ગામે નિર્માણધીન સ્વામિનારાયણ મંદિરમાં એક અત્યંત કાળજું કંપાવી દે તેવી દુર્ઘટના સામે આવી છે. અહીં ૧૮ વર્ષીય આદિવાસી શ્રમિક કિરણ ડામોર પહેલા માળે સેન્ટિંગનું કામ કરી રહ્યો હતો, તે દરમિયાન અચાનક તેનું સંતુલન બગડતાં તે સીધો નીચે જમીન પર પટકાયો હતો. નીચે પડતી વખતે ત્યાં ઊભેલો એક તીક્ષ્ણ લોખંડનો જાડો સળિયો તેની આંખની બાજુમાંથી પ્રવેશીને ખોપરી ચીરીને માથાની આરપાર નીકળી ગયો હતો, જ્યારે બીજો સળિયો તેના ડાબા હાથમાં ઊંડે સુધી ખૂંપી ગયો હતો. આ ભયાનક અકસ્માત જોઈને આસપાસ કામ કરતા અન્ય શ્રમિકો પણ ડચી ગયા હતા અને ત્યાં નાસભાગ મચી ગઈ હતી.
ઘટનાની ગંભીરતા જોતા સાથી શ્રમિકોએ ભારે હિંમત દાખવીને સાઈટ પર પડેલા ઇલેક્ટ્રિક ગ્રાઇન્ડર મશીન વડે સળિયાનો બાકીનો બહારનો હિસ્સો સાવચેતીપૂર્વક કાપી નાખ્યો હતો. માથામાં સળિયો ખૂંપેલી લોહીલુહાણ હાલતમાં જ કિરણને 108 એમ્બ્યુલન્સ મારફતે સુરત નવી સિવિલ હોસ્પિટલના ટ્રોમા સેન્ટર ખાતે ખસેડવામાં આવ્યો હતો. યુવકની અત્યંત ગંભીર હાલત જોઈને હોસ્પિટલનું તંત્ર પણ દોડતું થઈ ગયું હતું અને ન્યુરોસર્જન, જનરલ સર્જન, એનેસ્થેસિયા તેમજ ક્રિટિકલ કેર વિભાગના તમામ સિનિયર તબીબોને તાત્કાલિક ઓપરેશન થિયેટરમાં બોલાવી લેવામાં આવ્યા હતા.
મેડિકલ સાયન્સમાં 'એક્સ્ટ્રીમલી રેર' ગણાતા આ કેસમાં તબીબોની ટીમે મગજની નસો અને આંખના સંવેદનશીલ ભાગોને વધુ નુકસાન ન થાય તે રીતે અત્યંત સાવધાનીપૂર્વક ક્રેનિયોટોમી એટલે કે ખોપરી ખોલીને ઓપરેશન હાથ ધર્યું હતું. સતત ૩ થી 4 કલાક ચાલેલી આ હાઇ-રિસ્ક સર્જરીના અંતે ડોક્ટરો માથામાંથી લોખંડનો સળિયો બહાર કાઢવામાં સફળ રહ્યા હતા. જોકે, મગજના આંતરિક ભાગમાં ગંભીર ઈજા અને હેમરેજ હોવાને કારણે સર્જરી સફળ થયા બાદ પણ કિરણ ડામોરને ન્યુરો આઈસીયુ માં વેન્ટિલેટર સપોર્ટ પર રાખવામાં આવ્યો છે, અને આગામી 48 થી 72 કલાક તેના જીવન માટે અત્યંત નાજુક હોવાનું તબીબો જણાવી રહ્યા છે.
