દેવભૂમિ દ્વારકા જિલ્લાના કલ્યાણપુર પંથકમાં હાલ ખાનગી વીજ કંપનીની દાદાગીરી અને સ્થાનિક ખેડૂતો વચ્ચેનો વિવાદ વરવો સ્વરૂપ ધારણ કરી રહ્યો છે. કલ્યાણપુર તાલુકાના કાનપર શેરડી ગામે બનેલી એક ચોંકાવનારી ઘટનાએ આખા વિસ્તારમાં હડકંપ મચાવી દીધો છે. ખેતરોની વચ્ચે ચાલી રહેલા વીજ કંપનીના કામકાજની કાયદેસરતા ચકાસવા માટે જ્યારે ગામના લોકો અને ખેડૂતોએ મંજૂરીના કાગળો માંગ્યા, ત્યારે વાત વણસી ગઈ હતી અને મામલો લોહીયાળ જંગ સુધી પહોંચી ગયો હતો.
ગામની સીમમાં ચાલી રહેલા આ કામ અંગે જ્યારે ખેડૂતોએ કંપનીના માણસો પાસે આધારભૂત દસ્તાવેજો માંગ્યા, ત્યારે કાગળો બતાવવાને બદલે કંપનીના કર્મચારીઓ ઉદ્ધતાઈથી વર્તવા લાગ્યા હતા. વાતચીતમાંથી શરૂ થયેલી બોલાચાલી જોતજોતામાં ઉગ્ર વિવાદમાં ફેરવાઈ ગઈ હતી. આ દરમિયાન સ્થળ પર હાજર રહેલા એક શખ્સનો પિત્તો એટલો બધો છટક્યો કે તેણે તમામ હદો વટાવી દીધી. સ્થાનિકોના ગંભીર આક્ષેપ મુજબ, આ ઉશ્કેરાયેલા શખ્સે ત્યાં શાંતિપૂર્ણ રીતે વિરોધ કરી રહેલા નિર્દોષ ગ્રામજનો પર સીધું જ ટ્રેક્ટર દોડાવી દીધું હતું.
સદનસીબે ત્યાં હાજર લોકોએ અદ્ભુત સમયસૂચકતા વાપરીને તાત્કાલિક આઘાપાછા થઈ જાન બચાવી લીધી હતી, જેના કારણે એક મોટી જાનહાનિ ટળી ગઈ હતી. આ ભયાનક હુમલા અને હોબાળાની પળેપળની વિગત ત્યાં ઉપસ્થિત એક જાગૃત નાગરિકના મોબાઈલના કેમેરામાં કેદ થઈ ગઈ હતી. આ વાયરલ થયેલા વીડિયોએ વીજ કંપનીની જોહુકમી અને મનમાનીનો પર્દાફાશ કરી દીધો છે, જેને લઈને ખેડૂત આલમમાં ભારે આક્રોશ ફાટી નીકળ્યો છે અને પંથકમાં પોલીસ તથા પ્રશાસન સામે પણ સવાલો ઉઠી રહ્યા છે.
