આજકાલ આખી દુનિયામાં આર્ટિફિશિયલ ઇન્ટેલિજન્સ એટલે કે AI ની બોલબાલા ચાલી રહી છે, ત્યારે ટેક વર્લ્ડમાંથી એક મોટા સમાચાર સામે આવ્યા છે. એલન મસ્કની જાણીતી સ્પેસએક્સ કંપનીએ AI પ્રોસેસર્સ એટલે કે જીપીયુ ખરીદવા માટે મોટી રકમનું ફંડ ઊભું કર્યું છે. કંપનીએ આ માટે 40 અબજ ડોલરનું ડેટ ફાઇનાન્સિંગ પૂરું કરી લીધું છે. એલન મસ્કે સોશિયલ મીડિયા પર આ વાતની જાહેરાત કરતા જણાવ્યું છે કે આ ફંડનો મુખ્ય ઉપયોગ જીપીયુ ખરીદવા માટે કરવામાં આવશે, જે આગામી વર્ષના પ્રથમ બે ક્વાર્ટરમાં કંપનીને મળી જશે. સ્ટારલિંક સેટેલાઇટ ઇન્ટરનેટ અને રોકેટ લોન્ચિંગના મજબૂત બિઝનેસના કારણે સ્પેસએક્સની માર્કેટમાં સારી શાખ છે, જેનાથી તેને આસાનીથી ક્રેડિટ મળી ગઈ છે.
AI ની રેસમાં આગળ રહેવા માટે કંપનીઓ પાણીની જેમ પૈસા ખર્ચી રહી છે અને સ્પેસએક્સ પણ આમાં પાછળ નથી. કંપનીના નાણાકીય આંકડાઓ પર નજર કરીએ તો, 30 સપ્ટેમ્બરે પૂરા થયેલા ત્રિમાસિક ગાળામાં સ્પેસએક્સની આવક 161% વધીને 14.58 અબજ ડોલર થઈ ગઈ છે. આ આંકડા સાબિત કરે છે કે કંપની દ્વારા AI ક્ષેત્રે કરવામાં આવેલા મોટા રોકાણ હવે રંગ લાવી રહ્યા છે અને તેનાથી જબરદસ્ત કમાણી પણ થઈ રહી છે. જોકે આ ટેકનોલોજી પાછળ ખર્ચ પણ એટલો જ મોટો થઈ રહ્યો છે, કારણ કે કંપનીનો કેપિટલ ખર્ચ વધીને 19.6 અબજ ડોલર સુધી પહોંચી ગયો છે.
આ તરફ ઓસ્ટિનમાં સ્પેસએક્સ અને ટેસ્લાનું જોઈન્ટ વેન્ચર તેરાફેબ આગામી વર્ષે મે અથવા જૂન સુધીમાં પોતાની પહેલી ટેસ્ટ ચિપ તૈયાર કરી લેશે તેવી આશા છે. કંપનીનું લક્ષ્ય 2028ના ત્રીજા ક્વાર્ટર સુધીમાં આ ચિપ્સનું મોટા પાયે પ્રોડક્શન શરૂ કરવાનું છે. સ્પેસએક્સે અગાઉ જ પોતાના દસ્તાવેજોમાં સ્પષ્ટ કર્યું હતું કે તેઓ પોતાના જીપીયુ જાતે મેન્યુફેક્ચર કરવા માટે મોટું રોકાણ કરવા જઈ રહ્યા છે. ટૂંકમાં કહીએ તો એલન મસ્કનું આ પગલું ભવિષ્યની AI ટેકનોલોજીમાં સિંહફાળો આપવા માટે સૌથી મોટું સાબિત થવા જઈ રહ્યું છે.
