અમદાવાદમાં મેઘરાજાએ વિદાય શું લીધી, જાણે હવામાં કોઈએ ઝેર ઘોળી દીધું હોય તેમ પ્રદૂષણનું પ્રમાણ ખતરનાક રીતે વધી રહ્યું છે. શહેરમાં એર ક્વોલિટી ઇન્ડેક્સ એટલે કે AQI વધીને સીધો 187 પર પહોંચી ગયો છે, એટલું જ નહીં પરંતુ હેબતપુર, ખોડિયાર, સોલા અને વસંતનગર જેવા પોશ વિસ્તારોમાં તો આ આંકડો 200ની સપાટી પણ વટાવી ગયો છે. સામાન્ય રીતે ચોમાસા દરમિયાન વરસાદના કારણે હવામાં રહેલી ધૂળ અને રજકણો બેસી જતા હોય છે, પરંતુ હવે વરસાદ બંધ થતા જ વાહનોનો ધુમાડો, ચારેબાજુ ચાલી રહેલા મોટા બાંધકામોની ધૂળ અને ફેક્ટરીઓનું ઉત્સર્જન ફરી એકવાર ખુલ્લેઆમ હવામાં ભળી રહ્યા છે જેના કારણે શુદ્ધ હસવું પણ મુશ્કેલ બન્યું છે.
હવાની આ બગડેલી સ્થિતિ ખાસ કરીને અસ્થમા, શ્વાસ કે હૃદયની બીમારીઓથી પીડાતા લોકો માટે કોઈ આફતથી કમ નથી. AQI જ્યારે 200ની ઉપર જાય ત્યારે તેને ખરાબ શ્રેણી ગણવામાં આવે છે અને આ પ્રદૂષિત હવા સીધા ફેફસાં પર હુમલો કરે છે. જેના કારણે લોકોને ઉધરસ આવવી, ગળામાં બળતરા થવી અને શ્વાસ લેવામાં ભારે તકલીફ પડવી જેવી સમસ્યાઓનો સામનો કરવો પડી રહ્યો છે. આ ગંભીર સ્થિતિને જોતા ડોક્ટરો અને આરોગ્ય નિષ્ણાતોએ સ્પષ્ટ ચેતવણી આપી છે કે અસ્થમાના દર્દીઓ તેમજ સિનિયર સિટીઝનો અને નાના બાળકોએ વહેલી સવારે કે મોડી સાંજે બિનજરૂરી ઘરની બહાર નીકળવાનું ટાળવું જોઈએ અને જો બહાર જવાનું અનિવાર્ય હોય તો પૂરી સાવચેતી રાખવી જરૂરી છે.
શહેરમાં વધી રહેલા આ પ્રદૂષણના રાક્ષસને કાબૂમાં લેવા માટે હવે માત્ર નાગરિકોની સાવચેતી જ નહીં, પરંતુ તંત્રએ પણ સક્રિય થવું પડશે. રસ્તાઓની ધૂળ ઉડતી અટકાવવા માટે પાણીનો છંટકાવ, બાંધકામની સાઇટ્સ પર નિયમોનું કડક પાલન અને ટ્રાફિકના ધુમાડા પર લગામ કસવી હવે સમયની સૌથી મોટી માંગ બની ગઈ છે. જ્યાં સુધી હવાનું પ્રદૂષણ ઘટીને સામાન્ય સ્તરે નહીં આવે ત્યાં સુધી અમદાવાદના નાગરિકોએ ખુલ્લા આકાશ નીચે શ્વાસ લેતી વખતે પણ ડરવાનો વારો આવ્યો છે અને સૌ કોઈ રાહ જોઈ રહ્યા છે કે ક્યારે આ ઝેરી હવામાંથી રાહત મળશે.
