આજના ડિજિટલ યુગમાં એઆઈ અને ટેક્નોલોજી ક્ષેત્રે દબદબો જમાવી રહેલી દિગ્ગજ કંપની માઈક્રોસોફ્ટને યુકેમાં મોટો આંચકો લાગ્યો છે. વાત એમ છે કે માઈક્રોસોફ્ટે યુકેના એસેક્સ ખાતે એનસ્કેલ કંપની સાથે હાથ મિલાવીને એક મોટું ડેટા સેન્ટર બનાવવાનું નક્કી કર્યું હતું. પરંતુ હવે વીજળીના સપ્લાય બાબતે મોટો પ્રોબ્લેમ ઊભો થયો છે. નેશનલ ગ્રીડ તરફથી પાવર કનેક્શન મળવામાં સીધો 2030 સુધીનો વિલંબ થાય તેમ હોવાથી માઈક્રોસોફ્ટે આ ડીલમાંથી ખસી જવાનો નિર્ણય કર્યો છે. કંપનીએ સ્પષ્ટ કહી દીધું છે કે વર્તમાન સંજોગોમાં આ પ્રોજેક્ટ આગળ વધારવો અશક્ય છે.
આ ભાગીદારી તૂટવાથી માઈક્રોસોફ્ટની ઓપરેશનલ રણનીતિને મોટો ફટકો પડ્યો છે. ડેટા સેન્ટર ચલાવવા માટે અધધ વીજળીની જરૂર પડતી હોય છે અને જો સમયસર પાવર સપ્લાય ન મળે તો મોટા પાયે નુકસાન થઈ શકે છે. જો કે, આટલી મોટી અડચણ આવ્યા પછી પણ એનસ્કેલ હિંમત હારી નથી. કંપનીએ સ્પષ્ટ કર્યું છે કે તે યુકેમાં પોતાના એક્સપન્શન પ્લાન પર આગળ વધવાનું ચાલુ જ રાખશે. આ માટે તેઓ વીજળીના વૈકલ્પિક ઓપ્શન્સ પર ગંભીરતાથી વિચાર કરી રહ્યા છે જેથી પ્રોજેક્ટને નવેસરથી પાટા પર ચડાવી શકાય.
આ ઘટના દર્શાવે છે કે ટેક્નોલોજી અને એઆઈ સેક્ટરની તેજી વચ્ચે હવે પાવર અને ઈન્ફ્રાસ્ટ્રક્ચર જેવી પાયાની બાબતો પણ કેટલી મહત્વની બની ગઈ છે. વીજળીની અછત કે કનેક્શનમાં થતા વિલંબ હવે મોટા પ્રોજેક્ટ્સની ચાલ પણ બદલી નાખી રહ્યા છે. આગામી સમયમાં માઈક્રોસોફ્ટ અને એનસ્કેલ આ મુશ્કેલીમાંથી બહાર નીકળીને કેવી નવી રણનીતિ અપનાવે છે તેના પર આખી ટેક વર્લ્ડની નજર રહેશે.
