આજે સોશિયલ મીડિયા પર એક એવી મજેદાર ચર્ચા શરૂ થઈ છે જે વાંચીને દરેક ભારતીયને હસવું પણ આવશે અને વિચારતા પણ થઈ જશે. વાત જાણે એમ છે કે મોટી ગ્લોબલ કંપની આઈકેયા દ્વારા આપણા ઘરની સામાન્ય એવી સ્ટીલની થાળીને પ્રીમિયમ લાઈફસ્ટાઈલ પ્રોડક્ટ તરીકે રજૂ કરવામાં આવી છે. આ થાળીની કિંમત આશરે 760 રૂપિયા રાખવામાં આવી છે. વિદેશી ઇન્ફ્લુએન્સર અમાન્ડા મોનસેને સોશિયલ મીડિયા પર આ થાળીને ચિક ક્રોમ પ્લેટ તરીકે દેખાડી ત્યારથી આ મામલો ચર્ચામાં આવ્યો છે. કોલ્હાપુરી ચપ્પલ અને દુપટ્ટાથી લઈને હવે સ્ટીલની થાળીઓ સુધી, આપણી રોજીંદી વસ્તુઓને વિદેશી બજારમાં મોંઘા ભાવે વેચવાનો ટ્રેન્ડ ચાલી રહ્યો છે.
આ અનોખા ટ્રેન્ડ પર દેશના જાણીતા ઉદ્યોગપતિ હર્ષ ગોએન્કાએ પોતાની આગવી શૈલીમાં કટાક્ષ કર્યો છે. તેમણે સોશિયલ મીડિયા પર ખૂબ જ રમુજી અંદાજમાં લખ્યું કે, જો આ જ રીતે ચાલતું રહ્યું તો આગામી સમયમાં આ લોકો આપણા રસોડાના વેલણનું નામ બદલીને એરોડાયનેમિક ડો-ફ્લેટનિંગ વૉન્ડ કરી નાખશે અને તેની કિંમત સીધી 4500 રૂપિયા રાખી દેશે. હર્ષ ગોએન્કાની આ ફની કમેન્ટ ઇન્ટરનેટ પર આગની જેમ વાયરલ થઈ રહી છે અને લોકો તેના પર ખૂબ મજા લઈ રહ્યા છે.
આપણી વર્ષો જૂની અને સાદી વસ્તુઓને આધુનિક ગ્લોબલ માર્કેટમાં મોંઘા ભાવે વેચવાની આ ફેશન કંઈ નવી નથી. અગાઉ પણ ઘણી દેશી ચીજોને નવા નામો અને આકર્ષક પેકેજિંગ સાથે પ્રીમિયમ કેટેગરીમાં વેચવામાં આવી છે. જોકે, સોશિયલ મીડિયા પર આ પ્રકારની પ્રોડક્ટ્સ અને તેના પર આવતી રમુજી કમેન્ટ્સ વાચકો અને યુઝર્સ માટે મનોરંજનનો મોટો વિષય બની ગઈ છે. સામાન્ય માણસ વિચારે છે કે જે સ્ટીલની થાળી આપણે ત્યાં લોકલ માર્કેટમાં ખૂબ જ સસ્તા ભાવે મળી જાય છે, તેને વિદેશી બ્રાન્ડ્સ માત્ર નામ બદલીને આટલા ઊંચા ભાવે કેવી રીતે વેચી શકે છે.
