મણિપુરના સિનાઈ કેમ્પમાં સુરક્ષા દળોએ એક મોટું ઓપરેશન પાર પાડીને કુકી આર્મ્ડ ગ્રુપના રજિસ્ટર્ડ કેડર હોવાનો દાવો કરતા 17 શખ્સોને ઝડપી પાડ્યા છે. 23 ઓક્ટોબરના રોજ મણિપુર પોલીસ, CRPFની ક્વિક એક્શન ટીમ અને કોબ્રા દ્વારા આ સંયુક્ત ઓપરેશન હાથ ધરવામાં આવ્યું હતું. આ સિનાઈ કેમ્પ સસ્પેન્શન ઓફ ઓપરેશન્સ એટલે કે SoO હેઠળ એક ડેઝિગ્નેટેડ કેમ્પ છે. પોલીસના જણાવ્યા અનુસાર, પકડાયેલા 17માંથી 8 લોકો કુકી નેશનલ આર્મી અને 9 લોકો કુકી લિબ્રેશન આર્મીના સભ્ય હોવાનું ખોટું નામ ધારણ કરીને ત્યાં રહેતા હતા. કેમ્પમાં વેરિફિકેશન કર્યા પછી આ તમામની ધરપકડ કરવામાં આવી છે.
આ ઓપરેશન દરમિયાન સુરક્ષાકર્મીઓએ કેમ્પમાંથી મોટો હથિયારોનો જથ્થો જપ્ત કર્યો છે. જેમાં 24 ફાયરઆર્મ્સ, 38 મેગેઝિન, મોટા પ્રમાણમાં એમ્યુનિશન, વિસ્ફોટકો, વાયરલેસ કોમ્યુનિકેશન ઇક્વિપમેન્ટ અને અન્ય લશ્કરી સાધનોનો સમાવેશ થાય છે. થોડા દિવસો પહેલા જ ઈમ્ફાલ ઈસ્ટ અને કાંગપોકપી જિલ્લાની સરહદ પાસે 3 મેઈતેઈ નાગરિકોની હત્યા થઈ હતી, ત્યારબાદ એક સ્થાનિક MLA દ્વારા આ કેમ્પ સામે સવાલો ઉઠાવવામાં આવ્યા હતા અને ગતિવિધિઓ શંકાસ્પદ લાગતા આ કાર્યવાહી કરવામાં આવી છે.
પોલીસે આ મામલે ભારતીય ન્યાય સંહિતા, આર્મ્સ એક્ટ અને એક્સપ્લોઝિવ સબસ્ટન્સ એક્ટ સહિતની કલમો હેઠળ ગુનો નોંધીને તમામ આરોપીઓને કોર્ટમાં રજૂ કર્યા હતા. કોર્ટે તમામ આરોપીઓને 31 ઓક્ટોબર સુધી એટલે કે 8 દિવસના પોલીસ રિમાન્ડ પર મોકલી આપ્યા છે અને તેમની હોસ્પિટલમાં મેડિકલ ટેસ્ટ પણ પૂર્ણ કરી લેવામાં આવ્યા છે. પોલીસ હવે તપાસ કરી રહી છે કે આ લોકો શા માટે ખોટી ઓળખ આપીને રહેતા હતા અને તેમની પાસે આટલા બધા હથિયારો ક્યાંથી આવ્યા તેમજ સોશિયલ મીડિયા કે અન્ય કોઈ માધ્યમથી તેઓ કોના સંપર્કમાં હતા. આ ઘટના બાદ સુરક્ષા એજન્સીઓ અને કેમ્પની પારદર્શિતા સામે પણ મોટા સવાલો ઊભા થયા છે.
