પટનામાં રવિવારે બિહારના પહેલા ચીફ મિનિસ્ટર શ્રી કૃષ્ણ સિંહની 139મી જન્મજયંતિ નિમિત્તે એક સભાનું આયોજન કરવામાં આવ્યું હતું. આ કાર્યક્રમમાં કોંગ્રેસ અધ્યક્ષ મલ્લિકાર્જુન ખડગે સંબોધન કરી રહ્યા હતા. તે દરમિયાન હોલની ભીડમાંથી એક શખ્સ સંતોષ કુમારે ચાર શબ્દો કહ્યા કે મોદી કહીં નહીં જાયેગા. આ સાંભળતા જ ખડગે ગુસ્સે થઈ ગયા અને તેમણે સામે આક્રમક અંદાજમાં પ્રતિક્રિયા આપતા કહ્યું કે મોદી કા બાપ ભી જાયેગા. ખડગેએ આ વાત ત્રણ વખત પુનરાવર્તિત કરી અને હાથ ઊંચો કરીને જોરદાર ગુસ્સો વ્યક્ત કર્યો હતો. જોકે, આ મામલો એટલો વધી ગયો કે રાજકારણમાં મોટો ભૂકંપ આવી ગયો.
વાસ્તવિકતા એ હતી કે સંતોષ કુમાર જે બોલી રહ્યા હતા તે વાત અધૂરી રહી ગઈ હતી અને અડધું વાક્ય જ લોકો સુધી પહોંચ્યું. સંતોષ કુમારે બાદમાં સ્પષ્ટતા કરતા જણાવ્યું કે તેઓ એવું કહી રહ્યા હતા કે જ્યાં સુધી જનતા બળવો નહીં કરે ત્યાં સુધી મોદી કહીં નહીં જાય. પરંતુ તેમની આ વાત હોલના શોરમાં દબાઈ ગઈ અને કોઈ તેનો અર્થ સમજી શક્યું નહીં. જેવા ખડગેએ આ વિવાદાસ્પદ શબ્દો કહ્યા, તુરંત જ હોલમાં હાજર અન્ય લોકોએ સંતોષ કુમારને ઘેરી લીધા અને તેમને ધક્કો મારીને હોલની બહાર કાઢી મૂક્યા, એટલું જ નહીં તેમને મારપીટ પણ કરવામાં આવી. બહાર નીકળીને સંતોષ કુમારે ફરી પીએમ મોદી વિરુદ્ધ નારા લગાવ્યા અને કહ્યું કે પીએમ મોદીએ દેશ માટે કંઈ નથી કર્યું.
આ ઘટના બાદ રાજકારણ ગરમાયું છે અને ભાજપના દિગ્ગજ નેતાઓ અને મંત્રીઓએ કોંગ્રેસ અધ્યક્ષ પાસે જાહેરમાં માફી માંગવાની માંગ કરી છે. ભાજપ દ્વારા આ મુદ્દે દેશભરમાં વિરોધ પ્રદર્શન કરવાની પણ જાહેરાત કરી દેવામાં આવી છે. એક અડધા વાક્ય અને ગેરસમજને કારણે શરૂ થયેલો આ વિવાદ હવે રાષ્ટ્રીય સ્તરે ચર્ચાનો વિષય બન્યો છે અને બંને પક્ષો આ મુદ્દે आमने-सामने આવી ગયા છે.
