મહીસાગર જિલ્લાના બાલાસિનોર શહેરમાંથી એક ચોંકાવનારા સમાચાર સામે આવ્યા છે, જેણે કાયદો અને વ્યવસ્થાની સ્થિતિ સામે ગંભીર સવાલો ઊભા કરી દીધા છે. શહેરના વ્યસ્ત ગણાતા સલ્યાવડી દરવાજા પાસે અને અંબેમાના મંદિરની બરાબર આગળ એક અજાણ્યા શખ્સે રસ્તા પર જ એક યુવક પર અચાનક છરી વડે ઘાતક હુમલો કરી દીધો હતો. આ હુમલામાં ઇન્દિરાનગરી વિસ્તારમાં રહેતા રામાભાઈ ભા નામના વ્યક્તિ ગંભીર રીતે ઘાયલ થયા છે. અજાણ્યા હુમલાખોરે એક પછી એક છરીના ઘા ઝીંકીને યુવકને લોહીલુહાણ કરી દેતા આસપાસના વિસ્તારમાં ભારે નાસભાગ મચી ગઈ હતી અને લોકોમાં સન્નાટો છવાઈ ગયો હતો. અચાનક બનેલી આ ઘટનાથી સ્થાનિક લોકોમાં ડરનો માહોલ જોવા મળ્યો હતો.
આ લોહિયાળ કાંડ બાદ સ્થાનિક લોકોએ માનવતા દાખવીને લોહીથી લથપથ હાલતમાં રસ્તા પર પડેલા ઘાયલ યુવકને તાત્કાલિક હોસ્પિટલ પહોંચાડવા માટે તરત જ 108 એમ્બ્યુલન્સને ફોન કર્યો હતો. પરંતુ સૌથી દુઃખદ બાબત એ રહી કે ઇમરજન્સી સેવા હોવા છતાં 108 એમ્બ્યુલન્સ ઘટનાસ્થળે પહોંચવામાં પૂરી 30 થી 35 મિનિટ જેટલો લાંબો વિલંબ થયો હતો. ગંભીર ઇજાગ્રસ્ત યુવક રસ્તા પર દર્દથી તડપી રહ્યો હતો અને હાજર લોકો લાચાર બનીને માત્ર 108ની રાહ જોઈ રહ્યા હતા. સમયસર મેડિકલ સહાય કે વાહન ન મળવાને કારણે લોકોમાં તંત્ર અને લાપરવહી સામે ભારે રોષ ભભૂકી ઉઠ્યો હતો. અંતે પોલીસને જાણ કર્યા બાદ 108 એમ્બ્યુલન્સ ઘટનાસ્થળે પહોંચી હોવાનું સામે આવ્યું છે.
આ હુમલો શા માટે કરવામાં આવ્યો, તેની પાછળ કઈ અદાવત કે કારણ હતું અને હુમલો કરનાર અજાણ્યો શખ્સ ક્યાં નાસી છૂટ્યો તે હજુ રહસ્યના દાયરામાં છે. પોલીસે આ મામલે ગુનો નોંધીને આસપાસના વિસ્તારોના સીસીટીવી ફૂટેજ અને અન્ય પુરાવાઓ એકત્ર કરીને હુમલાખોરને શોધી કાઢવાની સઘન તજવીજ હાથ ધરી છે. બીજી બાજુ, ઇમરજન્સી સેવામાં 108 એમ્બ્યુલન્સ પહોંચવામાં આટલો બધો વિલંબ કેમ થયો અને આ બેદરકારી પાછળ કોણ જવાબદાર છે તેની સામે પણ ઉચ્ચ સ્તરે તપાસ થવી જોઈએ તેવી ઉગ્ર લોક માંગ ઉઠી રહી છે.
