દેશના સૂક્ષ્મ, લઘુ અને મધ્યમ ઉદ્યોગોમાં નવી વ્યાપારિક તકોના સર્જન અને તેને વેગ આપવાના ભગીરથ પ્રયાસરૂપે લઘુ ઉદ્યોગ ભારતી ગુજરાત પ્રદેશ દ્વારા ગાંધીનગર એક્ઝિબિશન સેન્ટર ખાતે પંદરમા ઇન્ડિયા ઇન્ડસ્ટ્રિયલ ફેરનો રંગેચંગે પ્રારંભ કરવામાં આવ્યો છે. ચાર દિવસીય આ વિશાળ ઔદ્યોગિક પ્રદર્શનનો શુભારંભ રાજ્યના મુખ્યમંત્રી ભૂપેન્દ્રભાઈ પટેલના કરકમલો દ્વારા કરવામાં આવ્યો હતો. આ પ્રદર્શનનો મુખ્ય હેતુ રાજ્યના ઉદ્યોગોને વૈશ્વિક સ્તરનું પ્લેટફોર્મ પૂરું પાડવાનો અને આત્મનિર્ભર ભારતના સ્વપ્નને સાકાર કરવાનો છે, જેમાં ઉદ્યોગ જગતના દિગ્ગજો મોટી સંખ્યામાં ઉપસ્થિત રહ્યા હતા.
આ ચાર દિવસીય ભવ્ય પ્રદર્શનમાં પાંચસોથી વધુ પ્રદર્શનકારો દ્વારા બારથી વધુ અલગ અલગ સેક્ટર્સમાં અત્યાધુનિક ટેક્નોલોજી અને વિવિધ પ્રોડક્ટ્સનું પ્રદર્શન કરવામાં આવ્યું છે. આ પ્રદર્શનીમાં એન્જિનિયરિંગ, મશીનરી, મેન્યુફેક્ચરિંગ, ઓટોમેશન, ટૂલિંગ, કાસ્ટિંગ તેમજ દેશની સુરક્ષા સાથે સંકળાયેલ સંરક્ષણ ક્ષેત્ર સહિતના વિવિધ અગ્રેસર ઉદ્યોગો જોડાયા છે. આ ભવ્ય આયોજનના ભાગરૂપે પ્રદર્શનના બીજા દિવસે ગુજરાતની સૌથી મોટી પ્રભાવક બેઠકનું વિશેષ આયોજન કરાયું છે, જેમાં નવા વિચારોના આદાનપ્રદાન સાથે વ્યાપારી નેટવર્કિંગ અને આગામી સમયની નવી વ્યાપારિક તકો અંગે વિસ્તૃત ચર્ચાઓ કરવામાં આવશે.
ઉદ્યોગો માટે કુશળ માનવબળની ઉપલબ્ધિ સુનિશ્ચિત કરવા અને રાજ્યના યુવાનો માટે રોજગારીની સોનેરી તકો પૂરી પાડવાના ઉદ્દેશ્યથી આ મેળાના અંતિમ દિવસે એક ભવ્ય રોજગાર મેળાનું પણ વિશેષ આયોજન કરવામાં આવ્યું છે. આ પ્રદર્શન માત્ર ઉદ્યોગોના વિકાસ પૂરતું મર્યાદિત નથી, પરંતુ તે યુવા પેઢી માટે રોજગારના નવા દ્વાર ખોલનારૂં માધ્યમ બનશે. આ પ્રકારના વિશાળ આયોજનોથી ગુજરાતના ઉદ્યોગ ક્ષેત્રે નવી ક્રાંતિ આવશે અને રાજ્ય દેશભરમાં ઔદ્યોગિક વિકાસનું રોલ મોડેલ બનશે તેવી દ્રઢ શ્રદ્ધા આ અવસરે વ્યક્ત કરવામાં આવી હતી.
