બનાસકાંઠા જિલ્લાના કાંકરેજ તાલુકાના જૂના જામપુર વિસ્તારમાં આવેલ બનાસ નદીના પટમાં લાંબા સમયથી ચાલી રહેલી ગેરકાયદે રેતી ચોરીની પ્રવૃત્તિ સામે આખરે ખાણ ખનીજ વિભાગ સફાળો જાગ્યો છે. ગુરુવારના રોજ વહેલી સવારના સુમારે મોટા જામપુર ગ્રામ પંચાયતની હદમાં આવેલા બનાસ નદી કોઝવે પર ખાણ ખનીજ વિભાગના અધિકારીઓએ અચાનક ત્રાટકીને મોટું ઓપરેશન હાથ ધર્યું હતું. જિલ્લા ભૂસ્તરશાસ્ત્રીના માર્ગદર્શન હેઠળ જિલ્લા ફ્લડ ટીમ અને સ્થાનિક અધિકારીઓની સંયુક્ત ટીમે આ આકસ્મિક દરોડો પાડીને ખનીજ ચોરોમાં ભારે ફફડાટ ફેલાવી દીધો હતો.
પ્રાપ્ત વિગતો અનુસાર, દરોડાની આ કાર્યવાહી દરમિયાન નદીના પટમાંથી ગેરકાયદેસર રીતે રેતીનું ઉત્ખનન કરી રહેલું એક લોડર મશીન, રેતી ભરવા માટે ઊભેલા આઠ મોટા ડમ્પરો અને એક ટ્રેક્ટર સહિતના શંકાસ્પદ વાહનોને ઝડપી પાડવામાં આવ્યા હતા. જોકે, દરોડાની આગોતરી ગંધ આવી જતાં કેટલાક વાહનચાલકો અને ખનનકર્તાઓ સમયસૂચકતા વાપરીને સ્થળ પરથી નાસી છૂટવામાં સફળ રહ્યા હતા. પકડાયેલા તમામ વાહનોને તાત્કાલિક ધોરણે ડિટેઈન કરીને આગળની કાયદેસરની દંડકીય કાર્યવાહી માટે નજીકના પોલીસ મથક ખાતે ખસેડવામાં આવ્યા હતા. આ વાહનોને પોલીસ મથકે લાવવામાં આવ્યા ત્યારે વાહન માલિકો અને ડ્રાઇવરોના ટોળેટોળાં એકઠા થઈ ગયા હતા.
તાજેતરમાં જ આ વિસ્તારમાં રોયલ્ટી પાસ વગર અને રોયલ્ટીની આડમાં બેફામ ખનીજ ચોરી થતી હોવાના અહેવાલો સતત સામે આવી રહ્યા હતા, જેને ધ્યાનમાં રાખીને તંત્ર દ્વારા આ લાલ આંખ કરવામાં આવી છે. ખાણ ખનીજ વિભાગની આ અચાનક અને સઘન કાર્યવાહીથી રેતી માફિયાઓમાં ભારે હડકંપ મચી ગયો છે. તંત્ર દ્વારા આ મામલે કડક તપાસ શરૂ કરવામાં આવી છે અને આગામી દિવસોમાં પણ આવા ગેરકાયદેસર કાર્યો સામે અવિરત ઝુંબેશ ચાલુ રાખવામાં આવશે તેમ જાણવા મળ્યું છે, જેથી સરકારી તિજોરીને નુકસાન પહોંચાડતા તત્વો પર લગામ કસી શકાય.
