ભરૂચ શહેરમાં ગેરકાયદેસર નશીલા પદાર્થોના વેચાણ અને હેરાફેરી સામે પોલીસે લાલ આંખ કરી છે. ભરૂચ સ્પેશિયલ ઓપરેશન ગ્રૂપની ટીમે ચોક્કસ બાતમીના આધારે સપાટો બોલાવીને જંબુસર બાયપાસ ચોકડી નજીક આવેલી એક ચાની દુકાનના સંચાલકને માદક પદાર્થ અફીણના જથ્થા સાથે ઝડપી પાડ્યો છે. પોલીસની આ ત્વરિત અને કડક કાર્યવાહીથી નશાના વેપાર સાથે સંકળાયેલા અસામાજિક તત્વોમાં ભારે ફફડાટ વ્યાપી ગયો છે.
ઘટનાની વિગત અનુસાર, ભરૂચ શહેરના જંબુસર બાયપાસ ચોકડી પાસે આવેલા મોહમદી કોમ્પ્લેક્ષમાં 'રજવાડી ચ્હા' નામની દુકાન ચલાવતા સંચાલક પાસે નશીલો પદાર્થ હોવાની બાતમી પોલીસને મળી હતી. બાતમીના આધારે પોલીસે તાત્કાલિક સ્થળ પર દરોડો પાડ્યો હતો. આ દુકાનની ઉપરના ભાગે આવેલા રૂમમાં રહેતા નરેશ તાજેત પાટીદાર નામના શખ્સને કોર્ડન કરી તપાસ હાથ ધરવામાં આવી હતી. તપાસ દરમિયાન તેના કબજામાંથી રૂપિયા ૪૮ હજારની અંદાજિત કિંમતનું કુલ ૯૬ ગ્રામ અફીણ મળી આવતાં પોલીસે સમગ્ર મુદ્દામાલ જપ્ત કર્યો હતો.
પ્રાથમિક પૂછપરછમાં પકડાયેલો આરોપી મૂળ રાજસ્થાનનો વતની હોવાનું બહાર આવ્યું છે. પોલીસ સમક્ષ આરોપીએ પોતે અફીણનો બંધાણી હોવાથી આ જથ્થો અંગત વપરાશ માટે લાવ્યો હોવાની કેફિયત રજૂ કરી હતી. જોકે, પોલીસ આ કેફિયત માત્ર બચાવ પૂરતી માની રહી છે અને તે સ્થાનિક સ્તરે અન્ય કોઈને આ નશીલો પદાર્થ વેચતો હતો કે કેમ તે દિશામાં પણ તપાસ કેન્દ્રિત કરી છે. આ ઉપરાંત આ પ્રતિબંધિત જથ્થો તે ક્યાંથી લાવ્યો હતો અને આ નેટવર્કમાં અન્ય કોણ સામેલ છે તેની કડીઓ મેળવવા તજવીજ હાથ ધરાઈ છે.
ભરૂચ પોલીસે આ મામલે નાર્કોટિક્સ એક્ટ હેઠળ ગુનો નોંધી આરોપીની વિધિવત ધરપકડ કરી આગળની કાયદેસરની તપાસ શરૂ કરી છે. રાજ્યભરમાં ચાલતી નશાવિરોધી ઝુંબેશ હેઠળ પોલીસ હવે આ કેસમાં આંતરરાજ્ય ડ્રગ્સ સપ્લાય ચેઈનનો પર્દાફાશ કરવા માટે રિમાન્ડ મેળવવાની દિશામાં કાર્યવાહી કરી રહી છે.
