બોટાદ જિલ્લામાં ખેતીની જમીનને બિનખેતી કરવાના વર્ષ ૨૦૧૮ના ચકચારી લાંચ કેસમાં સ્થાનિક અદાલતે એક અત્યંત મહત્વપૂર્ણ અને દાખલારૂપ ચુકાદો આપ્યો છે. બોટાદ જિલ્લા પંચાયતની તત્કાલીન કારોબારી સમિતિના ચેરમેન સી.બી. ખંભાળિયા અને કારોબારી સમિતિના સભ્ય ઈશ્વર ભરાડિયા સામે લાંચ લેવાનો ગુનો સાબિત થતાં અદાલતે બંને દોષિતોને પાંચ-પાંચ વર્ષની સખત કેદની સજા ફટકારી છે. આશરે આઠ વર્ષ જૂના આ ભ્રષ્ટાચારના પ્રકરણમાં અદાલતે કડક વલણ દાખવતાં સમગ્ર જિલ્લાના વહીવટી અને રાજકીય વર્તુળોમાં ભારે ખળભળાટ મચી ગયો છે.
પ્રાપ્ત વિગતો મુજબ, બોટાદ તાલુકાના કેરિયા ઢાળ ખાતે આવેલી આશરે દસ હજાર ચોરસ મીટર જેટલી ખેતીની જમીનને બિનખેતી કરાવવા માટે જમીન માલિક અને વકીલ હરેશ ડોડિયાએ બોટાદ જિલ્લા પંચાયત ખાતે કાયદેસર પ્રક્રિયા હેઠળ અરજી કરી હતી. જોકે, આ અરજી મંજૂર કરવાના બદલામાં કારોબારી સમિતિના તત્કાલીન ચેરમેન સી.બી. ખંભાળિયા અને કારોબારી સભ્ય ઈશ્વર ભરાડિયાએ અરજદાર પાસેથી પ્રતિ ચોરસ મીટર આઠ રૂપિયાના હિસાબે કુલ એંસી હજાર રૂપિયાની ગેરકાયદે લાંચની માંગણી કરી હતી.
અરજદાર કોઈપણ ભોગે લાંચ આપવા માંગતા ન હોવાથી તેમણે આ મામલે લાંચ રૂશ્વત વિરોધી બ્યુરોનો સંપર્ક સાધી વિધિવત ફરિયાદ નોંધાવી હતી. ત્યારબાદ લાંચ રૂશ્વત વિરોધી બ્યુરોની ટીમે છટકું ગોઠવી બંને પદાધિકારીઓ વિરુદ્ધ કાયદેસર કાર્યવાહી હાથ ધરી હતી. આ સમગ્ર પ્રકરણમાં તપાસ અધિકારીઓ દ્વારા તપાસ પૂર્ણ કરી અદાલતમાં ચાર્જશીટ રજૂ કરવામાં આવી હતી.
આ કેસની અંતિમ સુનાવણી બોટાદના પ્રિન્સિપાલ ડિસ્ટ્રિક્ટ જજની કોર્ટમાં ચાલી હતી. સુનાવણી દરમિયાન ફરિયાદી પક્ષે રજૂ કરેલા સાક્ષીઓ, પંચનામા અને સચોટ પુરાવાઓ તેમજ સરકારી વકીલ અને ફરિયાદી પક્ષના વકીલોની ધારદાર દલીલોને ન્યાયાધીશે ગ્રાહ્ય રાખી હતી. પુરાવાઓના આધારે અદાલતે બંને આરોપીઓને ભ્રષ્ટાચાર નિવારણ અધિનિયમ હેઠળ દોષિત ઠેરવીને પાંચ-પાંચ વર્ષની સજા સંભળાવી છે. ભ્રષ્ટાચાર આચરતા લોકપ્રતિનિધિઓ સામે અદાલતે આપેલા આ ચુકાદાથી સામાન્ય નાગરિકોમાં ન્યાયતંત્ર પ્રત્યેનો વિશ્વાસ વધુ દ્રઢ બન્યો છે.
