અમેરિકાના કોલોરાડો રાજ્યમાં આવેલું લુલુ સિટી આજે ભલે એક ભૂતિયા નગર બની ગયું હોય, પણ ઈતિહાસના પાના પલટાવીએ તો 1880ના દાયકામાં આ જગ્યા અસલી રોનકથી ધમધમતી હતી. પર્વતોની ગોદમાં વસેલા આ વિસ્તારમાં અચાનક ચાંદીની ખાણો મળી આવી અને રાતોરાત આખી કિસ્મત બદલાઈ ગઈ. ચાંદીની લ્હાયમાં દેશભરમાંથી હજારો સાહસિકો, કામદારો અને વેપારીઓ અહીં દોડી આવ્યા હતા. થોડા જ સમયમાં અહીં પાકા મકાનો, હોટલ, સેલૂન અને દુકાનો ધમધમવા લાગી હતી અને એક ભરેલું-પૂરું શહેર ઊભું થઈ ગયું હતું.
પરંતુ કોઈ પણ સોનેરી સવાર પાછળ અંધારી રાત છુપાયેલી હોય છે તેમ આ ચમક વધારે સમય ટકી નહીં. લુલુ સિટીની ચાંદીની ખાણોમાં થોડા જ વર્ષોમાં સંગ્રહાયેલી ધાતુ ખૂટવા લાગી. વળી, અહીંની ખાણોમાંથી ચાંદી કાઢવી અને તેને બહાર બજાર સુધી પહોંચાડવી એ ખૂબ જ મોંઘું અને ખતરનાક સાબિત થતું હતું. 1880ના દાયકાના અંત આવતા સુધીમાં તો ચાંદીના ભાવ પણ ગગડી ગયા, જેના કારણે ખાણ માલિકોએ અહીંથી પોતાના બોરિયા-બિસ્તરા ગોલ કરવાનો વારો આવ્યો.
આજે પરિસ્થિતિ એવી છે કે લુલુ સિટીમાંથી ચાંદી તો શું, માણસો પણ ગાયબ થઈ ગયા છે. પ્રકૃતિએ ધીમે ધીમે આખા વિસ્તારને પોતાના કબજામાં લઈ લીધો છે અને જૂના મકાનોના માત્ર ભગ્ન અવશેષો જ બાકી રહ્યા છે. આજે આ જગ્યા ટ્રેકિંગ અને હિસ્ટ્રી લવર્સ માટે એક અદ્ભુત સ્પોટ બની ગઈ છે, જ્યાં લોકો ભૂતકાળના પડઘા સાંભળવા અને આ કુદરતી સૌંદર્ય માણવા આવે છે. ક્યારેક માનવીય ઉત્સાહથી ધમધમતી આ ખીણ આજે ફક્ત પવનનાસસકારા અને ઈતિહાસની વાતો જ વાચકો સામે મૂકે છે.
